SHILLONG: Ri Bhoi a·jao kulina sienggipa LPG bottling plant-ko rikani kamrang matchotangengahani gimin a·doko manderangni LPG-na chagrongna nangenggipa neng·nikanirangko bakan namatna man·naba dongaha.
Kobor on·timgiparangni u·iatani gitade, Ri Bhoi a·jani ICAR complex sambao LPG bottling plant-ko rikani kamrang da·o 80 percent-ni gita matchotmanaha aro ia karkanako March jani gisepon matchotna ka·dongenga.
Indake ong·genchimoba, ia karkanako commission ka·ani ba gas-rangko chipe nianikode July jaosa man·na ka·dongenga ine kobor on·timgiparang parakataha.
Ia karkanako commission ka·ani matchotahaon, ia bottling plant-ko ia bilsini August jaonin chalaina man·gnok ine kobor on·timgiparang u·iataha.
Ia LPG bottling plant-ko chalaina a·bachengahaon, ia karkanao metric ton (MT) 30,000 LPG-ko tarina man·gnok.
Da·o dipet Meghalaya a·dokni pilak biaprangon, LPG bottling plant dongkujani a·sel Assam-ni bottling plant-rangosa pangchakna nangkuengachim.
