B’deshi-ni manderangko re·napbana dakchakenggiparangko KSU mikrakata

SHILLONG: Bangladesh a·songni manderangko Meghalaya a·dokona napsrukbana dakchakanirangko on·jachina gita Khasi Students Union (KSU), sima jolrango songdongenggipa manderangna mikrakataniko on·ataha.
Sima jolrango songdongenggipa mitam manderang, Bangladesh a·songni manderangko napsrukbana dakchakanirangko on·enga ine koborrangko man·ani ja·man, sima jolrango songdongenggipa manderangna KSU, mikrakataniko on·angaha.
“Simarango bading chiwalgiparangsan bading chiwalani kamrangko ka·enga ong·ja indiba mitam manderang, Bangladesh a·songona ma·manti bosturangkoba badingsrukatenga. Sima jolrango songdongenggipa an·ching jattangonin mitam manderangde, Bangladesh a·songni manderangko niam gri India a·songona re·napbana dakchakanirangko on·enga,” ine KSU-ni president Lambokstarwell Marngar aganaha.
KSU-ni pilak unit-rangkon, mongsongbate sima jolrango donggipa unit-rangko, mikrake dongchina gita uamang ge·etaniko on·ataha ineba Marngar parakataha.
Bangladesh a·songni manderangko Meghalaya a·dokona re·bana dakchake on·gipa manderangni kosako, mongsongbate Khasi manderangni kosako KSU, rakgipa ja·kurangko de·anggen ineba ua mikrakataniko on·angaha.
“Indakgipa manderangko rim·a man·genchimode, ia manderang chingni jong-adarangan ong·genchimoba chinga rakgipa ja·kurangko de·na misiljawa. Gipin biaprangoni an·ching a·dokona niam gri napsrukaniko champengna chinga dakgrikengon, jattangonin mitam manderang, gipin biapni manderangko a·dokona, mongsongbate Khasi-Jaintia-rangni a·jaona re·napbana dakchake on·skaenga,” ine Marngar aganaha.
Iandakgipa kamrangko dontongchina didiatengon, Bangladesh aro gipin biaprangoni manderangko niam gri napsrukbana dakchake on·angkua ong·ode, uandakgipa manderangni kosako rakgipa ja·kurangko de·anggen ine KSU president mikrakataniko on·angaha.
Re·anggipa January 20 tariko, West Jaintia Hills a·jani police-rang, Dawki ramao sandirokenba, Bangladesh a·songni sak 18 manderangko, a·doko rim·na man·ahachim. Ia manderang baksana Lad Demthring-oniko Meban Dkhar aro Melari Rasmut-koba police-rang, ia manderangko re·napbana dakchake on·ahani gimin rim·ahachim.