KHARKUTTA: North Garo Hills a·jani Kharkutta C&RD Block ning·o donggipa Darang Rongru Adhoc Upper Primary (UP) skul nok namsrangjahani a·sel skulo poraienggipa bi·sarang aro skigiparangba neng·nikanirangko chagrongna nangtokenga.
Skulko chalaienggipa headmaster-ni parakatani gitade, ia skul nokko 1969 bilsio kuturi ge·bri baksa Assam-Type-o rikaha aro ia skul, 1971 bilsion adhoc gadangko man·ahachim. Indake ong·genchimoba, ia skulko kulichengaonin changsaba ia skul nokko taripiltaia dongkujae da·o ia skul nokni obosta namsrangjaha aro skulo poraienggipa bi·sarang neng·nikanirangko chagrongna nangtokenga ine skulni headmaster u·iataha.
Da·o ia skulo poraienggipa chatro chatrirang sak 27-san dongaiaha aro skigiparang sakbri donga.
Ia skulara Dokongsi songni ning·o ga·akgipa skulan ong·a.
Kobor on·ani gitade, ia skul nokni do·garang namsrangjaha aro kelkirangba bang·batan dongjaha. Ia skulni a·parangba indita bilsirang ong·e da·o obosta dongsrangjaengaha ine kobor on·timgiparang u·iataha.
“Skangode ia skulo poraigipa bi·sarangan bewalan bang·achim indiba da·o skul nokni obosta namsrangjahani gimin bang·bata ma·a paarangan, an·tangtangni dedrangko ia skulo watjaha aro gipin songrangona rimangesa wattokenga,” ine skulni headmaster parakataha.
Ia skulni bidingo uamang changni chang, North Garo Hills a·jani Education department-na u·iatahachim indiba da·alonan maming dakchakanirangko man·kujaenga ineba ua aganaha.
Headmaster-ni u·iatani gitade, ia skul nokko songni polling station dakeba jakkalenga indiba ia skul nokko rikpiltaie on·na gisik nangtokjaenga.
“Skul nok namsrangjaengahani a·selan mikka balwa rakbajokode chinga class-rangko ra·na man·jaha aro skulko chutti watna nangrongaia. Uni gimin ia skul nokko ta·raken taripile on·china chinga sorkariko mol·molatenga,” ine skulni headmaster aganaha.
