WILLIAMNAGAR: Re·anggipa January-ni 25 tarik pringwalo, East Garo Hills a·jani police-rang, Dura Bawegre song samba jolo donggipa buringoniko, bobil dake chakatgipa dolrangni dongnue donanggipa silchidare, guli aro bomarangko man·aha.
East Garo Hills Police-rangni u·iatani gitade, ia silchidarerangni bidingo koborko man·soani ja·man, SP, Additional SP, gipin police officer-rang aro East Garo Hills DEF-ni Special Operation Team (SOT), Robibar pringwalni 1:00 bajimangon, ia biapona re·ange, dongnue dongipa silchidarerangko sandina a·bachengataha.
Ia buringoniko am·sandion police-rang, silchidarerangko aro gopretna jakkalgipa bosturangko, a·ao dape donako man·aha. Ia silchidare, guli aro gopretani bosturangko Garo National Liberation Army (GNLA) aro United Liberation Front of Asom (ULFA) bobil dolni manderang, dongnue donangahakon ine police-rang chanchichipenga.
Ia buringoniko police-rangni man·gipa bosturangara, AK-56 rifle pongsa, AK magazine ge·sa, pistol ponggittam baksana magazine ge·gni, a·songo tarigipa double barrel rifle, gopretna jakkalgipa bosturang, rong 99 AK 7.62 guli, gong 4 7.65 mm guli, electric detonator ge 50, ge 11 shotgun cartridge aro digital timer baksa chatgimin Improvised Explosive Device (IED) ong·a. Ia IED-ko ja·mano East Garo Hills Police-ni Bomb Squad, kimite galna man·aha.
Iani bidingo police-rang, Arms Act aro Explosive Substances Act-ni dongimin niamrango pangchake, Williamnagar Police Station-o mokordomako ka·aha aro iani bidingo ning·tue sandirokna a·bachengataha.
