Dosi dakgipani kosako ja·ku de·na police ka·dongata
TURA: Re·anggipa January 9 tariko Rajabalani Goalgaon-o saksa ACHIK activist ACHIK activist, Dilseng Sangma-ko chadrape so·otani a·selni bidingo ning·joljol so·sojengjeng ong·engani jatchio, an·tangtangko ISIS-K ine a·kangenba, Turani Araimile OP-ni ning·o ga·akgipa Tura Law College-ni sepango ge·sa electrict post-o A·chikrangko ka·mikkenate segipa poster-ko tape donanganichi s·sojengjeng ong·anirang ding·chaodapenga.
Poster-ko nika joljolan district police uko ra·onaha, aro outpost-o mamla segate donaha.
Indake ong·genchimoba obostarang social mediao gipaha aro re·anggipa somoio Dilseng Sangmako so·otani bidingo obostarang ding·e dongengani gimin da·o bate ding·batangaha.
Indake Dilseng-ko so·otaonin obostarang ning·joljol ding·e donggenchimoba, Garo Hills-ni darang biapoba dal·a a·sel apot ong·anide dongkujaenga ine nikna man·aha.
Ia obostarangna mikrakenga aro iana ja·kol sane kam ka·gen ine WGH police koborna parakaha.
“Law College sepango tape dongipa poster-ni bidingo chinga mikrake dongenga, aro da·o dipetode iana agrede Garo Hills-ni darang district-oba indakgipa poster-ko nika dongkuja. District-o so·so jengjeng ong·atna gita ian saniba an·tangni ba dolni man·gnina dakasan ong·naba donga ine a·bachenge sandie nikani gitade ong·enga” ine WGH-ni SP, Abraham T Sangma koborna u·iataha.
“Tape donanggipa poster-ko ra·galaha aro Forensic-o nina gita watatgen. Ia mamlako Araimile Police Station-o segataha aro am·sandina a·bachengengaha. Unomitingo poster tape donangenba jatrangni gisepo nanggrikatna dakgipako, manderangko kenjagokatgipako aro so·ojengjeng ong·atna dakgipa mandeko rim·na sandienga aro niamo pangchake kamrangko ka·gen” ine SP aganaha.
Unigimin iani bidingo kenjagokjachina aro tol·gipa kattarangko social mediao gipatjachina gita SP mol·molaha, jedakgipa post-rangan tom·tome ba meli nangrime donganiko chel·ata aro so·so jengjeng ong·atani ra·baa.
Unomitingo saniba maiba chanchipna kragipa kamrangko ka·enganiko banobarang nikgenchimode sepangbatgipa Police Station, Out Post, Beat House ba Police Control Room (PCR), Tura-ona +918837423053, +91 7005530510 aro + 91 9089199064 ia mobile number-rangona ta·raken kobor on·atchina gita jinmana u·iataha. Da·o dipet West Garo Hills district-o obostarang tom·tomen dongenga aro tom·tomaniko rakkiangkuna kamrangko ka·enga ineba West Garo Hills Police parakataha.
