TURA: South West Garo Hills District-o Indian National Congress (INC)-na kam ka·gipa a·gipi dilgiparang Sonibaro Party-oni ong·katgrimanga. South West Garo Hills District Congress Committee (DCC)-ni President Learmilford A Sangma unbaksa gipin a·gipi dilgiparang aro office –bearer-rang party-oni ong·katgrimtokaha.
Party-oni ong·katgiparangara, Pillarson B. Marak, General Secretary, DCC SWGH; Tengman M. Marak, Vice President, Salmanpara Block Congress Committee; Titnal A. Sangma, Treasurer, DCC SWGH; Trenish D. Sangma, Accountant, DCC SWGH; Salgra M. Sangma, President, Ampati Block Congress Committee; Chesrang D. Sangma, Vice President, Ampati BCC; Nikacheng Ch. Marak, BLO, Ampati BCC; Jepsing Sangma, President, Mahendraganj BCC; Kreckstone R. Marak, General Secretary, Mahendraganj BCC; Tenzing T. Sangma, Secretary, Mahendraganj BCC; Nathaniel A. Sangma, Vice President, Mahendraganj BCC; Limberth D. Sangma, President, Rangsakona Block Congress Committee; aro Panseng A. Sangma, General Secretary, Rangsakona BCC ong·tokachim.
Learmilford uamangni party-oni ong·katni gimin Kobor ra·timgiparangna aganangengon, party-ko bilakatna japang ja·diloni kam ka·giparang adita dilgiparang party-oni ong·katani chitti-ko una on·aha, unigimin uaba uamang baksa party-oni ong·katna chanchia ine aganaha aro da·o dipet darang party-oba napna chanchiani dongkuja ineba aganaha. Mahendraganj Block Congress Committee-ni President Jepsing Sangma ni aganskani gitade, party-ko dilenggipa a·gipi dilgiparangoni dakchakanirang komia indake ong·genchimoba party-na kam ka·giparang chakchike kam ka·kuachim. Indiba simsakgijani aro nirokgijako man·ani gimin uamang Party-oni ong·katna chanchia ine aganangaha. Learmilford an·tangni party-oni ong·katani chittiko Sonibaro Asasang Orchid Lodge-o on·angaha.
