AMPATI: Adita salrangna skang, West Garo Hills a·jani Rajabala jolo donggipa Goalgaon songo, mande saksako so·otani ja·man so·sojengjeng ong·anirang namsrangkujaengani a·sel gue badinge cha·enggipa manderang aro game ge·e cha·enggiparang nangchakeaniko man·engani gimin Sombar salo, South West Garo Hills a·jani District Administration, tom·tomaniko rakkiangna gita Ampati-o jinma tom·aniko ong·atangaha.
Ia tom·bimonganio, Nokma Council-ni membor-rang, dingtang dingtang toromni dilgiparang, NGO-rang, market committee-rang, gue badinggiparang aro gipinrangba bak ra·angtokaha.
Ia tom·anio dingtang dingtang dilgiparang, jinmana aganprakengon, so·sojengjeng ong·enganichi gue bagan dake cha·enggiparangni neng·nikanirangko janapangenba, jatgnini gisepo tom·tome aro meli-nangrime dongna nangengani gimin janapangtokaha.
Goalgaon songo ong·anggipa obostani a·sel Garo Hills gimikon so·sojengjeng ong·na nangengani gimin ia obostakoba pilakan raken jegalangtokaha aro tom·tomaniko ra·bapilchina gita didiangtokaha.
Ia tom·anio, South West Garo Hills a·jani Deputy Commissioner Anendya Raajsshre-ba jinmana aganprakengon, South West Garo Hills a·jao chengonin dingtang dingtang jat aro toromni manderang, ku·cholsan nangrime songdongbaenga ine mikkangchiba apsan meli-nangrime janggi tangakuchina aro tom·tomaniko rakkiangchina didiangaha. Niamrangko skatang jako ra·jachina aro pangnan district administration baksa bakrimchina gitaba ua dingtang dingtang dolrangko aro a·jao songdongenggipa manderangko didiangaha.
West Garo Hills a·ja aro Assam-ni South Salmara a·ja baksa pangkamgipa tom·tomaniko ra·bana kamko ka·enga ine ia tom·anio District Administration-ni official-rang parakatenba, iandakgipa somoirango chakchike tom·tomaniko rakkiangchina didiangaha.
Ia tom·anio, SWGH a·jani SP Vikash Varma-ba jinmana aganprakengon, dingtang dingtang jatrangko tom·tome dongchina, social media-rango gipenggipa kattarangko kakket ong·ama ong·ja name sandichengchina aro banoba maiba a·selrang ong·genchimoba, niamko jaktango ra·gija ta·raken sepangbatgipa police station-na kobor on·china, a·jao songdongenggipa pilak manderangkon didiangaha.
