SHILLONG: Indo-Bangla sima gita Bangladesh a·songni na·tokrangko niam gri ra·napbaenga ine koborrangko man·ani ja·man, niam gri na·tok salbaaniko, donaniko aro pala sim·aniko, Meghalaya a·dokni damgni a·jarango champengataha.
Official-rangni u·iatani gitade, Bangladesh a·songni na·tokrangko niam gri ra·baenga ine koborrangko man·soani ja·man, manderangni an·seng baljokanina aro chel·chakaniko on·na gita East Khasi Hills aro South West Khasi Hills a·jarango, niam gri ra·napbaaniko aro pala sim·aniko champengataha.
East Khasi Hills aro South West Khasi Hills a·jarango, Bangladesh a·songoni na·tokrangko niam gri ra·napbana, donna aro palna sim·na gita Bharatiya Nagarik Suraksha Sanhita (BNSS) 2023-ni Section 163-ni ning·o champengataha ine District Administration-rang u·iataha.
Niam gri na·tokrangko ra·baanio ring ba garirango dakchakanirangko on·jachina gitaba sorkari, ge·etaniko on·ataha.
District Administration-oni u·iatani gitade, a·song damgnini simarang gita, chi ramarang gita, ramarang gita aro bazaar antirang gita Bangladesh-ni na·tokrangko niam gri a·dokona ra·baenga ine koborrangko man·soaha.
“Bangladesh a·songoni na·tokrangko niam gri ra·baaniara, customs aro import-export-ni niamrangko pe·an baksana cha·anirangko naljoke rakkina dongimin niamrangko pe·ani gita ong·enga. Iandake niam gri na·tokrangko ra·baanichi aro pala sim·anichi ian manderangna namgijaniko ra·baan baksana a·doko na·tok badinggiparangna aro a·dok sorkarinaba noksan ong·ani ong·enga,” ine District Administration parakataha.
Ia niamko saoba manijagenchimode Bharatiya Nyaya Sanhita (BNS) 2023-ni Section 223, Customs Act, Foreigners Act aro Passport Act-ni ning·o sastirangko man·gen ineba District Administration, mikrakataniko on·angaha.
B’desh-oni niam gri ra·baenggipa na·tokrangko M’laya-o champengata
Date:
Share post:
