TURA: Re·anggipa January jani 9 tariko, Rajabala jolo donggipa Goalgaon songo, Dilseng M Sangma-ko so·ote galanina police-rang, mande saksako rim·dapna man·aha aro ia a·selna rim·ako man·giparang da·o gimik saksku gapengaha.
Police-rangni u·iatani gitade, ia a·selni bidingo police-rang, bilsi 26 ong·gipa Anisul Sheikh-ko Mongolbar walo, Bhaitbari songoniko rim·na man·aha.
“Dilseng M Sangma-ko so·otanina Rajabala-ni police-rang, bilsi 26 ong·gipa Anisul Sheikh-ko rim·dapna man·aha. Rim·ako man·gipa mande, batanggimin adita salrangna police-rangoni kate dongengachim indiba uko police-rang, Mongolbar walo, Bhaitbari songoniko rim·na man·aha,” ine West Garo Hills a·jani Superintendent of Police (SP) Abraham T Sangma parakataha.
Iana skangba police-rang, ia a·selni bidingo sakchet manderangko rim·na man·ahachim aro rim·ako man·gipa manderangni bimingranga, bilsi 30 ong·gipa Anarul Islam, bilsi 47 ong·gipa Rafiqul Islam, bilsi 40 ong·gipa Atowar Hussain, bilsi 30 ong·gipa Ariful Islam, bilsi 21 ong·gipa Ashadur Sheikh, bilsi 22 ong·gipa Mozidur Hussain, bilsi 33 ong·gipa Mofidur Hussain aro bilsi 22 ong·gipa Mozahidur Rahman ong·a.
Re·anggipa January-ni 9 tarik salpaksakchibara, Rajabala jolo niam gri chalaienggipa ro·ong quarry-ko chipatna re·ange re·bapilengmiting somoio ACHIK dolni membor-rangko Goalgaon songo, dolsa manderang champengsoenba, ro·ong, rua, jompol aro uandakgipa silchidarerangchi chadrapsoaha aro ia manderangni chadrapanichi, ACHIK membor-rangoni saksa Dilseng M Sangma, rasong gribee so·otako man·na nangahachim.
Ia a·selni bidingo sandirokna gita Dadenggre-ni Sub-Divisional Police Officer (SDPO) RA Sangma-ni dilanichi Special Investigation Team (SIT)-ko songaha aro ia a·selo jak donggipa manderangni bidingo saoba koborrangko man·genchimode, 7005680094 nombor-ona u·iatchina police-rang u·iataha.
Rajabala jolo mande saksako so·otanina saksako rim·dapa, saksku gapaha
Date:
Share post:
