SHILLONG: Meghalaya a·doko drugs ba pekatgipa samrangko jakkalani aro badingsrukaniko champengna a·dok sorkari, vehicle scanner-rangko dingtang dingtang biaprango donna tik ka·aha aro ia vehicle scanner-rangko jakkalanichi, gipin biaprangoni ra·napbaenggipa drugs-rangko champengna man·gen ine ka·dongenga.
Iani bidingo talataniko on·angengon, vehicle scanner-ko donna gita sorkari, biapko sandimanaha ine Budbar salo, Social Welfare department-ni Advisor Paul Lyngdoh parakataha.
“Vehicle scanner-rangko donahaon, pekatgipa samrangko a·dokona ra·baani komianggen ine chinga ka·dongenga. Da·o dipet chinga vehicle scanner-rangko ra·bana kam ka·engmiting,” ine Lyngdoh aganaha.
A·dokona drugs ra·napbaaniko champengna gita chel·chakgipa sipai dolni dilgiparangkoba nirikkina nanggenma ine sing·anina aganchakaniko on·angengon, iani bidingo sorkari, Cantonment aro 101 Area-ni official-rang baksa kamrangko ka·rimna apsan golpogrikmanaha ine Lyngdoh parakataha.
Sipai dolrangni biaprangonikoba am·sandianirangko dakjringenga ine janapatengon, vehicle scanner-rangko donahaon, darangkoba ianoniko watchanggaljawa ine Lyngdoh aganaha.
“Pilak garirangan ia vehicle scanner-chi nirikkianio dongna nangaigen,” ine ua aganaha.
Pekatgipa samrangoni 95 percent-kon, Myanmar aro Manipur gitasa Meghalaya a·dokona ra·napbaenga ine janapatskaengon, Manipur a·doko da·o gital sorkariko rikahaon, niamrangko nambate chalaina man·gnok ine Lyngdoh, an·tangni ka·dongchakenganiko parakataha.
Drugs jakkalani aro badingsrukaniko champengna kam ka·anio, DREAM Mission-chi sorkari aro dingtang dingtang dolrangni gisepo nambate kamrangko ka·na man·engaha ineba iana skang Lyngdoh parakataha.
Vehicle scanner-ko donanichi drugs ra·baako champengna man·gen: Sorkari
Date:
Share post:
