GH-o BJP-ko bilgriatna ‘ong·gija’ man·gipa tangkarangko jakkalenga ine Bernard matnanga

SHILLONG: Garo Hills-o Garo Hills Autonomous District Council (GHADC) election-na skang, Bharatiya Janata Party (BJP)-ko bilgriatna ‘ong·gija’ kamrangchi man·gipa tangka paisarangko jakkalenga ine Sombar salo, BJP-ni state vice president aro Tura-ni MDC Bernard N Marak matnangataha.
Bangladesh a·songoni niam gri napsrukbagipa manderangko a·rikgalna man·jaenggipa aro tangka paisa jakkalsretgipa dilgiparangni kosako BJP chadengenga ineba Marak parakataha.
Marak-ni parakatani gitade, Garo Hills-o bang·a manderangan kangal cholgri ong·na nangkuengon, Chief Minister baksa bak ong·enggipa manderangde, ong·gija kamrangchi tangka paisarangko man·skaenga aro kangal cholgrirangni janggi tanganiko nisigalenga.
Niam gri koela bikotani, niam gri koela salani, matchotgijagipa contract-ni kamrang aro tol·gipa bill-rangonikon ia dilgiparang, hisapgrigipa tangkarangko chimongenga ineba BJP-ni state vice president matnangataha.
GHADC election-na skang, Garo Hills-o BJP-ko watchina gita BJP-ni membor-rangna ‘lakni lak aro krorni kror’ tangkarangko on·enga ineba ua matnangataha.
Batanggimin bilsibongani gisepo National People’s Party (NPP), BJP-ni MDC saksako ruling-o done, sakgipinko opposition-o donskaenba ma·ekgrikatna jotton ka·aha ineba Marak matnangataha. BJP-ni MDC saksanade chu·gimik man·gnirangko on·e, sakgipinnade mamingkon on·skagija BJP-ni gisepo meligrikgijaniko ra·bana jotton ka·aha ineba Tura-ni BJP MDC matnangataha.
Mitam contractor-rangnade, scheme-rangko ku·rachakenga indiba ia scheme-rangara ja·mande ‘me·mang’ project-rangsa ong·skaenga ineba Marak matnangataha.
BJP-na kam ka·giparangko NPP-chi dilenggipa sorkari, miksongmanchaen kal·ake roenga ine matnangatengon, 2022 bilsio uni bank account-rangkoba sorkari ‘freeze’ ka·aha aro ia account-oni tangkarang gimaaha ine BJP-ni state vice president parakataha.
Ia tangkarangko niam gri koela bikotani aro salruraaoniko man·jagenchimode baoniko man·genchim ineba Marak sing·doataha.