Tangka paisa gamaniko a·a nokgiparang chu·ongnikja
WILLIAMNAGAR: East Garo Hills a·jao, National Highway (NH)-217 ramako apalbatate tarina a·arangko ra·anio, a·a nokgiparang, sorkarini on·enggipa compensation ba a·ani tangkarangko chu·ongnikjae, ra·chakjaengani gimin a·arangko gital dake topiltaichina District Administration ge·etaniko on·angaha.
February-ni 16 tariko, compensation-ko ra·chakna soi ka·gijagipa a·a nokgiparang baksa Williamnagar-ni DC office-o public hearing-ko dakani ja·man, a·arangko gital dake topiltaichina District Administration ge·etangaha.
A·arangko adita salrangni gisepon Deputy Commissioner (Revenue) topiltaigen ine ia om·anio official-rang, a·a nokgiparangna u·iataha.
Ia NH-217 ramako apalbatate tarina a·arangko ra·anio mitam manderangnade, uamangni nok aro a·ani kri tangka paisarangko on·jaengani a·sel a·a nokgiparang noksan ong·na nangenga ine badi ka·tokahachim.
Rongjeng Bazar-o bilsi 30-mangna nokdangni dokkanko chalaienggipa Shamina N Sangma-ba, una on·enggipa tangka paisarangko chu·ongja ine parakataha.
“Rongjeng Bazar-o angni kuturi ge·gittam donggipa dokkanna gong lak 8 compensation-ko on·aniara namen komibea maina ia tangkachi anga gipin biapo dokkan dake cha·nan chu·ongjawa. Da·o angni dokkanko pe·galani ja·mande anga gipin biaponiko dam rakbatesa a·ako ra·skana nanggnok indide chinga maikai janggi tangna man·gen?” ine Sangma sing·doataha.
Apsan daken, Rongjeng Bazar-o dokkan dake cha·enggipa MG Momin-ba an·tangna on·enggipa tangka paisarang komiani gimin suk ong·gijaniko parakataha.
“Chingni a·arangna sorkarini tangka gamaniko chinga chu·ongnikja maina chingni biaprangko breanina sorkari lak 6-mangmangkosan on·enga aro ia tangkarangchide angni nokdang aro anga janggi tangna man·jawa. Chinga chingni janggi tangani chol mingsamangmangkoba gimaatgnok,” ine Momin aganaha.
Indake ong·engon, a·a nokgiparangna sorkarini tangka paisa on·pilskaaniara, Right to Fair Compensation and Transparency in Land Acquisition, Rehabilitation and Resettlement Act, 2013 (RFCTLARR Act, 2013) baksa melijaenga ine social activist saksa Cherian G Momin-ba matnangataha.
