Minute 10-na Session-ko Speaker dontongata
SHILLONG: Meghalaya a·doko Inner Line Permit (ILP)-ko ra·gatna gita a·dok sorkari, gisiko nange kam ka·jaenga ine Opposition membor-rang matnangani ja·man Budbar salo, ruling aro opposition membor-rangni gisepo ding·chaogrikani ong·kataha aro uandaken Session-ko Assembly-ni Speaker Thomas A Sangma, minute 10-na dontongatna nangaha.
ILP-ni bidingo chanchirimaniko a·bachengatengon, a·doko ILP-ko ra·gatna gita a·dok sorkari kakket ong·e kamko ka·jaenga ine Opposition membor-rangoni Voice of the People’s Party (VPP)-ni MLA Ardent M Basaiawmoit matnangaha aro ja·mano ruling aro opposition membor-rangni gisepo ding·chaoe jera ra·grikani ong·kataha.
ILP-ni bidingo jera ra·grike ruling aro opposition membor-rang ding·chaogrikna a·bachengon, Assembly Speaker Thomas A Sangma chadengenba, membor-rangko asongchina aganaha indiba uamang asongna jechakon, Assembly Session-ko minute 10-na Speaker dontongataha.
Iana skang, VPP MLA Ardent M Basaiawmoit-ni matnanganina aganchakaniko on·angengon, ILP-ni bidingo MLA, changni chang a·songni Prime Minister aro Union Home Minister-na sedoataha ine a·dokni Chief Minister Conrad K Sangma aganenba, ua an·tangara badita chang Prime Minister aro Union Home Minister-na iani bidingo sedoatskaaha ine Basaiawmoit-ko sing·doskaaha. Ua (Basaiawmoit) an·tangde ILP-ni bidingo changsaba Union Home Minister-ko grongean dongkuja ineba Sangma aganaha.
Iani ja·man a·dokni Deputy Chief Minister Prestone Tynsong-ba chadenge, “Na·a ILP-na gisik nangbebea ong·ode Delhi-ona re·ange ma·mong sorkari baksa agangrikebo. Manderangni mikkango dakmesokako dontongbo,” ine Basaiawmoit-na aganaha.
Minute 10-na session-ko dontonge a·bachengpiltaiengon, “Ia nokara nama bewalo an·chingni chanchirimgipa noksa ong·a ine anga pilaknan gisik ra·atpiltaianiko on·na ska. Uni gimin pilak membor-rangkon nama bewalosa jera ra·grikani, sing·ani aro aganchakanirangko bak ra·china anga mol·molenga,” ine Assembly Speaker aganaha.
ILP-ni bidingo chanchirimanirangna aganchakaniko on·angkuengon, uni sorkari, ILP-na ma·mong sorkari baksa agangrikengkua aro apsan somoion Immigration & Foreigners Act 2025-ni ning·o a·dokko chel·chakna gitaba cholrangko nienga ine Chief Minister aganaha.
“Chinga badita changan iani bidingo India sorkariko gronge agangrikaha,” ine Chief Minister, VPP MLA-ni matnanganina aganchakaniko on·aha.
“MLA an·tangba badita changan Prime Minister ba Home Minister-ko grongna Delhi-ona re·angaha. Ua (Basaiawmoit) ILP-ko namen nangchongmotgipa ine aganenga, uni gimin ukoba anga ching baksa Delhi-ona re·e ma·mong sorkari baksa agangrikchina mol·molenga. NGO-rang aro dingtang dingtang dolrangba Delhi-ona re·angaha aro ILP-ni bidingo ma·mong sorkarina seataha indiba membor (VPP MLA) an·tangde iani bidingo ma·mong sorkarina seata dongkuja. An·ching an·tangtangni aganna gitan kamkoba mesokna nanga,” ine Sangma aganaha.
Chief Minister-ni aganchakanina sing·doangtaiengon, “CM angko matnangenga ong·ode, badita chang sorkari, apsan Delhi-ona re·na gita chingko okamaha? Chingni MP-ba iani bidingo ku·rangko on·aha,” ine Basaiawmoit aganskaaha.
North Shillong-ni VPP MLA Adelbert Nongrum-ba a·dok sorkariko, ILP-ni bidingo manderangko ‘togienga’ ine matnangataha. Iana aganchakaniko on·angskaengon, “Saoba togienga ong·ode ua an·tangan togipa ong·enga. Ua an·tangde changsaba Union Home Minister-ko grongkuja aro ILP-ni bidingo seataba dongkuja,” ine Chief Minister aganskaaha.
ILP-ni bidingo dolgnini jera ra·grikani Question Hour-na batangahani ja·mano pilak membor-rangkon asongchina Assembly Speaker aganaha.
