SHILLONG: Garo Hills-o National Highway (NH) ramarangna a·arangko ra·anio da·o dipet gong kror 268 tangkarangko, a·a nokgiparangna sualataha ine Bristibar salo, a·dokni Deputy Chief Minister aro PWD (Roads) Minister Prestone Tynsong, Assembly-o parakataha.
Tynsong-ni parakatani gitade, North Garo Hills a·jao sak 187 aro East Garo Hills a·jao sak 2,227 a·a nokgiparangna gimik gong kror 268 tangkarangko sorkari gamataha.
North Garo Hills a·jao sak 187 a·a nokgiparangna gimik gong 43,96,924 tangkarangko aro East Garo Hills a·jao sak 2227 a·a nokgiparangna gong 225,13,52,897.31 tangkarangko sorkari gamataha ineba Deputy Chief Minister parakataha.
Ia tangkarangara, NH ramarangna a·arangko ra·anio, a·a nokgiparangni bagan bari, nokrang, dokkanrang, bol wa·arang aro gipin gam-jinrangna gamskagipa tangka paisarang ong·a ineba Tynsong aganaha.
Iani bidingo, Kharkutta-ni MLA Rupert Momin, Assembly-ni Budget Session-o minggipin sing·aniko dakangengon, mitam a·a nokgiparangde tangka paisarangko man·e, an·tangtangna a·arangko breenga aro nokrangko riktokenga indiba mitam a·a nokgiparangde tangka paisarangko man·jae ba chu·onga gita tangka paisarangko man·jae, suk ong·tokskajaenga ine aganenba, iandakgipa nokdangrang, compensation-na dorgastorangko galpiltaina man·genma ine sing·doangaha.
Iana aganchakaniko on·angengon, a·arangko ra·anina 93 ba 94 percent-ni gitade tangka paisarangko chu·gimik gamanaha aro a·arangko rama tarina gita National Highways and Infrastructure Development Corporation Ltd (NHIDCL)-na pakwate on·manaha ine PWD (Roads) Minister parakataha.
Ramani mitam biaprangosa, mitam a·a nokgiparang, district administration-ni hisapaniko chu·ongnikkujaenga ineba ua talataniko on·angaha.
East Garo Hills a·jani Rongjeng jolrangode bang·a manderangan, an·tangtangni bagan bari aro dokkanrangko on·na nangahaoba, chu·onga gita tangka paisarangko man·tokjaenga ine matnanganirangko knasona man·ahachim.
Iani bidingo talataniko on·angengon, “A·a nokgiparangna cholrang dongkuenga. Uamang district administration-ni hisapko chu·ongnikjaenga ong·ode kachario badi ka·a man·gen. Sorkarini songe on·gipa ku·baltitimgipa iako uamang baksa agangrike namatna man·gen,” ine Tynsong aganaha.
