SHILLONG: Shillong-ni Lok Sabha MP Dr Ricky AJ Syngkon, re·anggipa Bristibar attamo tanggitik saaniko man·e siangahani gimin Sombar saloni ong·atenggipa Meghalaya Legislative Assembly-ni Budget Session-ko Sukrobar salo dontongatchengaha.
Shillong MP-ni siangani gimin Sukrobar pring 9:30 bajimango, Assembly-ni Business Advisory Committee (BAC), tanggitik tom·aniko ong·atenba, Assembly-ni Budget Session-ko dontongchengna tik ka·angaha.
BAC-ni tom·a matchotani ja·man kobor ra·timgiparangna talataniko on·angengon, 2026-27 bilsini Budget-ko Sukrobar salon parakani ong·achim indiba Shillong MP siani gimin a·dok sorkari baksa agangrikchengenba, Sukrobar salo Budget Session-ko dontongchengna committee tik ka·aha ine Assembly Speaker Thomas A Sangma parakataha.
“A·dok sorkari baksa agangrikchengenba Sukrobar salo, Assembly-ni Budget Session-ko dontongchengna tik ka·aha. Budget Session-ni bangki salrangna da·o Legislative Calendar-ko taripiltaienga aro ia Calendar-ko Sombar salo Assembly-ona ra·anggen,” ine Speaker aganaha.
BAC-ni taritaigimin Calendar-ko Assembly ra·chakgenchimode, Budget-ko Sombar salo parakatskaani cholrang donga ineba Sangma aganaha.
Iani ja·man Assembly-o dingtangmancha Shillong MP Dr Syngkon sagina mande ra·pilskaaniko dakenba Assembly-ni Session-ko dontongataha.
Shillong-ni Lok Sabha MP aro Voice of the People’s Party (VPP)-ni dilgipa Dr Ricky AJ Syngkon, robol kal·e roengmitingo tanggitik saaniko man·e ga·akaha aro ja·mano ua, Shillong-ni Dr H Gordon Roberts Hospital-o a·gilsakko watangaha.
Official-rangni u·iatani gitade, Bristibar attamo bilsi 54 ong·gipa Dr Ricky Syngkon, an·tangni ripengskarang baksa Mawlai Mawiong kal·chakramo robol kal·e roengachim indiba rang·san ua ka·tongni saaniko man·enba ga·akgropaha.
Ga·aka bakan Syngkon-ko uni ripengrang, Jaiaw-o donggipa Dr H Gordon Roberts Hospital-ona ra·angaha aro doctor-rang, uko sanna gita jotton ka·beahachim. Indiba rasong gribee ua, Bristibar walni 8:42 bajimango a·gilsakko watangaha.
Uni iandake tanggitik sianganina Meghalaya a·dokosan ong·aigija India a·song gimikon, dingtang dingtang dilgiparang jagokmanpilaniko aro kalimaniko parakattokaha.
Dr Syngkon sagini sianganina a·songni Prime Minister Narendra Modi, ma·mongo Opposition-ko dilgipa Rahul Gandhi, a·dokni Chief Minister Conrad K Sangma aro dingtang dingtang dilgiparangba kalimpaanirangko parakattokaha.
