SHILLONG: 1972 bilsini State Reservation Policy (SRP)-ko taridapjachina aro skango gitan apsan dake donangkuchina Expert Committee-ni ku·pattie on·aniko Hynniewtrep Youth Council (HYC) jegalataha.
Expert Committee-ni ku·pattie on·aniko jegalatengon, Expert Committee-ni Reservation Policy-ko taridapjachina ku·pattianiara, Khasi aro Jaintia jatrango manderangni jelbra jelsuaniko aro indita bilsirangna neng·nikanirangko nichanggala gita ong·enga ine HYC parakataha.
1972 bilsini Reservation Policy-ko skango gitan apsan dake donangkuchina Expert Committee-ni ku·pattianiara songsalo manderangni janggi tanganio dingtanganiko nichanggala gita ong·enga ine janapatskaengon, a·doko songdongenggipa pilak jatrangni namgninan Reservation Policy-ko gital dake nipiltaina nangchongmota ine HYC dabiangkuaha.
HYC-ni parakatani gitade, pilak jatrangni gisepon apsan ong·e bak rengsiko man·pachina aro kamrangko tikatanio maming dongnuanirang dongjana gitasa Khasi aro Jaintia jatni skia man·e kamgri ong·e dongenggipa chadamberang, Reservation Policy-ko gital dake taripilchina dabiengachim.
Reservation Policy-ko apsan ong·e donaigija, mande jelbra jelsuani, janggi tangani gadang aro jatni gadangrangko nigrikna nangchongmota ineba HYC dabiangaha.
Reservation Policy-o politics-ni gita maming mikkang niteani dongja nangja indiba songsalni namgninasa ong·na nanga ineba HYC parakataha.
Reservation Policy da·o indita bilsirang ong·e gitchamahani gimin aro ia gital chasongnade kraani ong·jahani gimin gital dake nipiltaina nangchongmota ineba HYC dabiangaha.
SRP-ko dingtangatjachina Expert Committee-ni agananiko HYC jegala
Date:
Share post:
