Uni janggi tanganina mittel mitchutoka
SHILLONG: Re·anggipa Bristibar attamo, Shillong-ni Lok Sabha MP Dr Ricky AJ Syngkon, tanggitik ga·akgrope siangani ja·man, dingtang dingtang biaprangoni bang·a dilgiparangan kalimpaanirangko parakatenba, uni namgipa gun aro bewalrangna mittelpilangtokaha.
Dr Syngkon-ni sianina United Democratic Party (UDP)-ni dilgipa aro West Shillong-ni MLA Paul Lyngdoh-ba kalimpaaniko parakatengon, “A·dokni saksa depante da·alo an·chingko wate re·angahani gimin dilgiparangni kalimpaanio angaba bak ra·paenga. Uni sianina an·ching kalimengon, uni name janggi tanganina an·ching Nokgipako mittelpilskanaba nanga,” ine parakataha.
Meghalaya a·dokni Bharatiya Janata Party (BJP)-ba Dr Syngkon-ni sianina kalimpaaniko parakataha.
“Shillong constituency-ni MP Dr Ricky AJ Syngkon-ni tanggitik sianiko knasoe chinga jadachangpilaha aro namen ka·a be·aha,” ine BJP-ni state president Rikman G Momin parakataha.
Dr Syngkon-ko a·doko saksa nambatsranggipa skigipa ong·achim ine janapatengon, uni janggi tanganio ua pangnan kusi ong·e mesokgipa aro uni namgipa bewalrangchi sakantini ka·tongrangkon nangdikataha ine Momin parakataha.
Dr Syngkon, saksa Isolo kakket ong·e bebera·gipa aro Meghalaya a·doko songdongenggipa Tribal-rangni namgnina an·tangko on·kange kam ka·gipa ong·achim ineba BJP-ni state president parakataha.
“Uni a·gilsakko watanganichi a·dokni politics-o bangbang ong·aha aro ia bangbang ong·gipa biapko kolgapatna namen neng·gnok,” ineba ua parakataha.
United Democratic Party (UDP)-ni president aro a·dokni Cabinet Minister Metbah Lyngdoh-ba Shillong MP-ni sianganina kalimpaaniko parakatengon, “Ua (Ricky) sina gita namen dambekuengachim ine ripengskarangni angna message watatako anga man·soaha. Uni bilsiko niatgenchimode darangan ia message ba koborko ang gitan ra·chakaigenkon,” ine parakataha.
Shillong constituency-ni manderang Dr Syngkon-ko bilsibonganasa seokahachim indiba ua bilsisa jaskusan dangdike on·angna man·aiaha ineba Lyngdoh, an·tangni suk ong·gijaniko parakataha.
An·tangni kamrangko Dr Syngkon, pangnan chu·sokatna gita kam ka·gipa ong·achim ine janapatengon, “Dr Syngkon, saksa mikkim gnanggipa, kakket ong·gipa aro namgipa gunrango bebera·gipa mande ong·e, sakgipinrangkoba name janggi tangna didigipa ong·achim,” ine UDP president parakataha.
