Tura Govt. Girls Hr. Sec. School-o Career Guidance programko ong·ata

TURA: Sonibar salo Hanuman Vyayam Prasarak Mandal, Amravati, Tura-oni HVPM-o chu·sokbae Garo Hills ni dingtang dingtang bakrango kal·susaani bidingo dangdike on·enggiparang Government Girls Higher Secondary School Tura-o Physical Education ba be·en bimangni an·seng-baljokanina, namgipa bewalrangko bang·bea kal·susaanirango changa-sapaniko skie ra·e kal·susaani a·bao Physical Education Teacher, Sports coach, Fitness Trainer, Gym Instructor, Physiotherapist, Yoga Instructor, Sports manager, Event organizer, Athletic Trainer aro Sports Therapists ni kamrangko man·e janggi tanganio re·mikkangna gita skie on·anga.
Ia programo mongsonggipa ong·e bakko ra·anggipa Shri. Mongera M. Marak, Physical Education ni gimin talatangaon Garo Hills -oni chadamberang Physical Education ni bidingo apalbee u·i-ma·siani dongkujae bang·bata chadamberangan higher secondary ni gadango poraikuengon doctor, engineer, ba officer rang ong·nasan jumang nikgipa ong·e iani gimin u·ina ja·man chakkuenga ine janapangaha. Una agreba Physical Education ko skie ra·na gita Garo Hills-o skie ra·chakramba dongkujani a·sel A·chik a·songni chadamberang u·ina ja·manchakkuenga jeni a·selan University, College, aro bang·bata skulrangon Physical Training Instructor ni kamrangnaba biap dongkujaenga ine Marak agandapanga.
Programo Shri. Mongera M. Marak, District Sports Officer, South Garo Hills, Dr. W. Kenedi Singh, aro Shri. Daimei Daimelian, Shri. Augustine A. Sangma, (PTI) South West Garo Hills aro HVPM-o chu·sokbagipa official rang aro Government Girls Hr. Sec. School, Tura ni chatrirang bakko ra·angaha.