TURA: Re·baenggipa April jani 10 tariko ong·atna tik ka·enggipa Garo Hills Autonomous District Council (GHADC) election-o susana gita A·chik ong·gijagipa candidate-rangnaba dingtang dingtang political party-rang, tikitrangko on·ahani gimin A·chik State People’s Front (ASPF) suk ong·gijaniko parakatenba, gipin jat candidate-rangna on·gipa tikitrangko ra·pilchina dingtang dingtang party-rangko didiataha.
Iani bidingo ASPF, National People’s Party (NPP), Indian National Congress (INC) aro Trinamool Congress (TMC)-ni dilgiparangna sedoatenba, gipin jat candidate-rangna on·gipa tikitrangko ra·pilchina didiataha.
“GHADC election-o susana gita A·chik ong·gijagipa candidate-rangnaba dingtang dingtang party-rang tikitrangko on·ahani gimin chinga Garo Hills-o songdongenggipa A·chik jatni pal, suk ong·gijaniko parakatenga. Chingni kobor man·soani gitade, 14-Betasing GDC constituency-o susana gita party tikitrangko on·aha aro ia candidate-rangara, NPP-ni Sanjay Koch, INC-ni Ajitav Koch aro0 TMC-ni Hemandra Koch ong·a,” ine ASPF-ni general secretary Bernita R Marak parakataha.
Garo Hills-ara A·chikrangni a·songsa ong·a aro da·o ong·atna sienggipa GHADC election-o A·chik ong·gijagipa manderangni susaaniko bang·a manderangan jegaltokenga ine janapatengon, ia election-o susana gita gipin jat candidate-rangna party tikit on·aniko ra·pilchina ASPF didiataha.
“A·chik ong·gijagipa candidate-rangna tikit on·aniko ra·pilaniara A·chik jatna namgni ong·gen aro ian A·chikrangni nangnikaniko chu·sokataniba ong·gen,” ine Marak parakataha.
