DADENGGRE: Bilsi sokkugijagipa bi·sarangko bia ka·atanirang batroroengani gimin bi·sarangna namgipa janggi tangani cholrangko on·na miksonganio 100 Day District-Wise Action Plan-ni bak gita dingtangmancha awareness program-ko Budbar salo, West Garo Hills a·jani Chibinang songo ong·atangaha.
Ia awareness program-ko Meghalaya State Legal Services Authority (MSLSA)-ni dakchakanichi ong·ataha aro ia program-ko NALSA ASHA Standard Operating Procedure (SOP) aro Bal Vivah Mukt Bharat Campaign-ni ning·o December 4 tarikoni March 8 tarikona dingtang dingtang biaprango ong·atenga.
Ia awareness program-ko ong·atanio, Tura-ni Assistant Legal Aid Defense Counsel Jingjang Ch Marak, jinmana aganprakengon, ia program-ni gamchataniko talate on·angenba, bi·sarangko, mongsongbate me·chik bi·sarangko bilsi sokgija bia ka·atanichi bi·sarangni janggi tanganio nangchakeanirangko aro namgijanirangko agan-talate on·angaha.
Ia program-ko ong·atanio, Tura District Child Protection office-oni official saksaba jinmana aganprakengon, bilsi sokkugijagipa bi·sarangko bia ka·aoniko naljokatna gita Missin Vatsalya Rehab Module aro Child Protection-ni bidingo agan-talatanirangko on·angaha. Bilsi sokkugijagipa bi·sarangko bia ka·aoniko warachakna gita legal aid service ba ainni gita on·enggipa dakchakanirang, helpline nombor-rang aro report ka·ani cholrangkoba ua jinmana agan-talate on·angaha.
Ia program-ko ong·atanio, Tura DLSA-ni Assistant Legal Defense Counsel Jeriko R Marak-ba jinmana aganprakengon, Child Marriage Act 2006-ko pe·anio dongimin sastirang aro dairangni gimin agan-talatanirangko on·angskaaha. Banoba bilsi sokkugijagipa bi·sarangko bia ka·atani bidingo koborko man·genchimode ba nikgenchimode sepangbatgipa police station ba office-rangona kobor on·china gitaba ua, jolo songdongenggipa manderangko didiangaha.
