Budget Session matchotani ja·man election-ni bidingo chanchigen: UDP

SHILLONG: Re·baenggipa April jani 10 tariko ong·atna sienggipa Garo Hills Autonomous District Council (GHADC) election aro adita salrangna skang Shillong-ni MP Dr Ricky AJ Syngkon-ni siangani ja·man Shillong Lok Sabha by-election-ko ong·atna nangengani gimin United Democratic Party (UDP)-ni dilgiparang, da·o ong·enggipa Assembly-ni budget session matchotani ja·man tom·e chanchirimna tik ka·angaha.
Iani bidingo kobor ra·timgipa manderang baksa agangrikengon, da·o dipet UDP-ni dilgiparang, iani bidingo chanchirimna man·kujaenga aro budget session matchotani ja·mansa jinma apsan tom·e chanchirimanggen ine Bristibar salo, UDP-ni president aro a·dokni Cabinet Minister Metbah Lyngdoh parakataha.
“Da·o dipet chinga party-ni gita iani bidingo chanchirima dongkuja. Budget session matchotani ja·mansa chinga tom·aniko ong·atenba, Shillong Lok Sabha by-election-ni giminba chanchigen,” ine Lyngdoh aganaha.
GHADC election-ni bidingo janapatskaengon, Garo Hills-o UDP-ni dilgiparang, an·tangtangan chanchie ja·kurangko de·enga ine Lyngdoh parakataha.
“Da·o dipet chinga Assembly-ni budget session-o jakchakkujaenga. Uni gimin budget session matchotani ja·man, haida re·baenggipa antio chinga tom·aniko ong·atna jotton ka·gen. GHADC election-na Garo Hills-ni dilgiparangan tom·e nanga gita ja·kurangko de·enga,” ine UDP president aganaha.
GHADC election-ni bidingo uamang, Garo Hills-ni dilgiparangna pakwatmanaha ine janapatengon, Assembly-ni budget session matchotahaon, uamang Garo Hills-ni dilgiparango sing·sandie, election-o susagenma susajawa, name tik ka·anggen ine UDP-ni president aganaha.
GHADC election-o UDP-ni tikitchi susana sikenggipa manderangko dorgasto galchina gita adita salrangna skangsan UDP-ni dilgiparang u·iatahachim.
“Chingo constituency dambrinade candidate-rang dongsomanaha aro chinga gipin constituency-rangnaba candidate-rangko okamna tik ka·aha,” ine adita salrangna skangsan, UDP Garo Hills Region (GHR)-ni secretary Anand M Marak parakataha.
“Scheduled Tribe candidate-rang, jemangan dilgipani gunrang donga aro manderangko dilna gita kragiparang ong·a, chinga uandakgipa candidate-rangna tikitko on·gen,” ineba UDP-GHR-ni secretary parakataha.