Bobil dolni gipin manderangkoba bame on·china sorkari didia
SHILLONG: West Khasi Hills a·jao Hynniewtrep National Liberation Council (HNLC) bobil dolni area commander ong·e kam ka·enggipa mande saksa Bristibar salo, Eastern West Khasi Hills a·jani Mairang-o an·tangko police-rangna bame on·eaha ine kobor on·aha.
Bame on·eani ja·man ia mandeko police-rang, a·dokni Director General of Police (DGP)-ona rimangaha.
Ia mandeni gimin parakna gita jechakatengon, police-rang, ia mandeo sing·sandianirangko dakengkua ie police officer saksa kobor ra·timgiparangna parakataha.
“Police-rang ia mandeo sing·sandianirangko dakengkuani gimin mamingkoba parakdapna man·kujawa,” ine police officer aganaha.
Indake ong·engon, HNLC bobil dolni gipin manderangkoba bame on·echina gita a·dok sorkari didiataha.
HNLC bobil dol baksa agangrikna sorkari da·oba do·gako oe donengkua ine parakatengon, da·o ja·kuko de·anide HNLC-ni jakosajok ine a·dokni Deputy Chief Minister aro Home (Police) Minister Prestone Tynsong aganaha.
“India sorkari aro a·dok sorkarichipakniba uamangna (HNLC) do·gako oe donengkua aro da·ode uamangni skaosa ong·aignok. Uamang nangnika ong·ode chinga agangrikaniko a·bachengpiltaina man·aigen indiba uamang re·baja ong·ode chinga mamingkoba agandapna man·jawaha,” ine HNLC-ni area commander saksa an·tangko bame on·eani ja·man Tynsong aganaha.
HNLC bobil dolni gipin manderangkoba tom·tomaona re·bapilchina didiatengon, bame on·egipa bobil dolni manderangna sorkari, chel·chakaniko aro pilak nanga dakchakanirangko on·aigen ine Deputy Chief Minister aro Home Minister Tynsong, ku·rachakaniko on·angaha.
“Chinga na·simangna dakchakanirangko on·aigen. Na·simang an·tangtangko bame on·egenchimode nang·ko sorkari chel·chakaigen,” ine Tynsong aganaha.
HNLC bobil dolo da·o badita sakrang dongkugen ine sing·on, iakode police headquarter-onisa u·iatgen ine Home Minister aganchakaha.
