Kangal cholgrirang private hospital-o sannaniko ra·na nangenga: VPP

SHILLONG: Sorkari hospital-rango sanna banani cholrang chu·ongjaengani a·sel kangal cholgrirangba, dam rakgipa private hospital-rango sanna bananirangko ra·na draatako man·enga ine Sukrobar salo, Nongkrem-ni Voice of the People’s Party (VPP) MLA Ardent Miller Basaiawmoit, Assembly-o parakatenba, sorkari hospital-rango chu·onga gita sanna banani cholrangko on·china sorkariko didiangaha.
“Kangal cholgrirang, private hospital-rango sanna bananiko ra·na man·gen ine an·ching ka·donge dongaina nangja,” ine Basaiawmoit aganenba, sorkari hospital-o chu·onga gita nephrologist-rangko rakkichina sorkariko didiangaha.
Basaiawmoit-ni agangipa kattarangna aganchakaniko on·angengon, sorkari hospital-rango sanna banani cholrangko mangrakbatatna gita Health department, raken kamko ka·enga aro dialysis dakanikoba da·o Meghalaya Health Insurance Scheme (MHIS)-o man·chapataha ine a·dokni Health Minister Wailadmiki Shylla parakataha.
Dialysis dakanichi sanna bananiko ra·na MHIS-ni ning·o gong kror 11.36-na baten sorkari tangka paisarangko gamaha ine Shylla, Assembly-na aganaha.
Sorkari district hospital-rango, dialysis changprakna gong 3000 ka·e ra·a ine janapatengon, ia korosrangko MHIS-ni ning·on man·chapa aro MHIS-ni namgniko private hospital-rangoba ra·na man·enga ine Health Minister talataniko on·angaha.
Meghalaya a·dok gimiko nephrologist saksamangmangsan dongaia ine janapatengon, “Nephrologist-rangni pal medicine doctor-rang, sanna bananirangko nirokskaenga,” ine Shylla aganaha.
Ia chanchirimanio Opposition-ko dilgipa Mukul Sangma-ba bak ra·e, sanna banani cholrangko namdapatchina didiangon, sanna banani korosrangko komiatna gita sorkari, cholrangko sandigen ine Health Minister ku·rachakaniko on·angaha.
Health Minister-ni parakatani gitade, da·o dipet Meghalaya a·doko ge 54 dialysis machine-rang donga aro ianoni ge 12-de Shillong Civil Hospital-o aro ge 42-de private hospital-rango ong·a.
Dialysis unit-rangko pilak a·jani sorkari hospital-rango donatgen aro ja·mano community health centre-rangoba kuligen ineba Health Minister ku·rachakaniko on·angaha.