TURA: India a·song gimiko February 28 tarikko 1928 bilsioni a·songni niksenggipa Scientist (Physicist) C.V. Raman- ni Raman Effect ko am·sandie nikchenga ja·man bilsi rikkit manirongengon Sonibar salni bako Tura Science Centre- oba maniangaha. Meghalaya Science Society, Tura, ia programme ko ong·atangengon “Women in Science: Catalysing Vikshit Bharat” katta ja·pangko ra·e maniangaha.
Ia programme ni bako Fr. Januarius S. Sangma, jinma na aganprakangengon Science, Mathematics ian ia chasongni bako chadamberangni re·mikkanganio nangchongmotgipa skie ra·ani katta ma·chong ong·enba uamangko Engineering, Medicine, aro Pharmaceuticals a·barango changbegipa-sapbegipa ong·atna man·gipaba ong·a. Indake songsalo janggi tangani bidingo an·chingna gisik-a·ning bitgipa koba nanga jeon mongsongbate me·chikrang ko bang·batatna nanga ine janapanga. Una agreba ia National Science Day ko maniani bako poraienggipa chadambe sakantian rake jotton ka·e, namgipa cholon-bewal rangko skie ra·e songsalna namgipa kamrangko on·gilna man·na gita an·tangtangko tariangkuna nanga ine agandapanga.
Ia programme-o mongsonggipa ong·e bakko ra·anggipa Fr. Januarius S. Sangma, SDB-Principal, Don Bosco College, Tura, Smt. Florina Boro, MCS, ADM, West Garo Hills, baksana gipin skigiparang aro dingtang dingtang skul, college ni chatro-chatri rang bakko ra·angtokaha. Ia National Science Day ko manianggipao Don Bosco College, Tura-o Science poraienggipa chatro-chatrirang CRISPR-Cas9 (Gene Editing tool), Renewable and Non-Renewable Resources, Hydraulic Bridge, Milk Adulteration testing ni bidingo rongtale dake mesokanikoba dakangjolaha.
