Tura: Social activist, Greneth Sangma, Wagesik-ni da·o ong·enggipa MDC Nathwal S Marak-ko tangka paisarangko jakkalsreta unbaksana Gasuapara, Rongrikim aro Silkigre MDC constituency-rango an·tangna campaign ka·na gita GHADC-ni tangkarangko aro gipin cholrangko jakkala ine matnange police-na badi ka·doaha.
MDC-ni uni constituency Wagesik-ona ra·bagipa scheme-rangni gimin RTI file ka·ani ja·man activist Greneth, FIR-ko segataha. Indake MDC-ko uni jako ra·gipa project-rang gimaengani bidingo aganchakchina sal 15 somoiko on·aha.
Nathwal Marak, GHADC-ni Civil Work Department-ni Executive Membor (EM) ong·enga.
“MLA election-na chakatmiting somoio MDC Nathwal Marak, jinmani tangkarangko jakkalsretaha, contractor aro labourer-rangko an·tangni namgnina kam ka·ataha, jekai- Gasuapara, Rongrikim aro Silkigre constituency-rango rama tarie on·aha. Ia constituency-rangoniko vote man·a miksonge ua road project-rangko jako ra·aha aro tangkarangko jakkalsretaha. Iarangni gisepon uni consituency Wagesik-o a·bachenggipa project ba scheme-rangni kamrang matchotgija galchipe dongiparang bang·a, mitamrangde bimangan dongsrangja, indiba ua donggija project-rangnaba tangkakode ra·aha ine activist matnangaha.
Batanggimin bilsi 2023 MLA election-o voter-rangko salna miksonge tangkarangko jakkalsretaha. Indiba ua election-o chejaha.
“GHADC-o uni ra·gipa chokki ba biapni bilko jakkalsrete, contractor aro labourer-rangko an·tangni namgnina kam ka·ataha. Uamangna jinmani tangkako gamaha. Uni constituency-o a·bachenggipa project ba scheme-rang matchotaha ine mesoke tangkarangko oke cha·aha, indiomangba am·sandie nioba project-rang dongan dongja.”
Iarangna activist, MDC-ni kosako Bharatiya Nyaya Sanhita (BNS) aro Prevention of Corruption Act-ni niamrango pangchake ja·ku de·china dabiaha.
