ANVC-A, ANVC-B, sorkari officer-rang baksa Tura Medical College-ko nirokea

TURA:  West Garo Hills, Tura Doldigre-o Tura Medical College rikenggipako songgrikaniko soi ka·giparang jedake ANVC-A aro ANVC-B dolni dilgiparang nangrime  jedake ANVC-A gitcham General Secretary Wanding Sangma, Publicity Secretary, Vicky Rose Sangma aro ANVC-B ni gitcham Chairman, Bernard Rimpu N Marak unbaksa sorkarini official-rang baksa Sonibar salo re·ange niangaha. Indake uamangni re·ange nirokanganio kamrang  aditan matchotaha indioba sorkari parakatani gita ia kamrang 78 percent matchotaha ine aganangahachim indiba 65 percent mangni gitasan kamrang matchotkuenga ine parakataha.
Gitcham ANVC-B ni dilgipa aro Tura-ni MDC, Bernard N Marak  kamrang nama aro namgijani bidingo aganangskaengon, ia project-ko 2024 bilsion matchotna nangahachim da·o 2026 bilsi ong·pilaha  indiba matchokuja. “Chingna u·iatani gitade, somai gita tangkarangko man·jaenga, architecture-rangko somai gita sokatjaenga aro labour-ni bidingoba neng·nikani donga uarangni a·selba neng·nikaniko man·enga, una agreba dingtang dingtang dingtang dakchakanirangko uamang nangenga,” ine gitcham Tura-ni MDC aro ANVC-B ni dilgipa Bernard N Marak aganangaha.
Detailed Project Report  (DPR) bidingo aganangskaengon, ia kamrang DPR-o on·gimin gita ong·jaenga jeon bang·a dingtangatanirangko nikaha jedake Rain Water Harvesting-ko ra·galaha, generator ge·gitamoniko da·o ge·sasan dongaiaha, ringna man·gipa chi aro fire safty-na jakalgipa china agre hospital-o jakalna nang·gipa chirang dongja unigimin maini a·sel ra·galaha sandina nanggen aro chingna mesokna nanggen ine Marak kobor ra·timgiparangna aganangaha.
Indake ong·genchimoba ia kamrangko re·baenggipa September jana skang matchotatchina aganangaha aro uamang man·a dipet jotton ka·gen ine ku·chakangaha. Unigimin neng·nikanirangko nirokna aro kamrangko ta·rakatna man·a gita chinga June jarangonide jaantian re·ange nirokangtaigen ineba gitcham ANVC-B ni dilgipa aro Tura-ni MDC, Bernard N Marak parakataha.