Isolni kamna an·tangtangko on·kangchina chadamberangko didianga
TURA: India aro Nepal a·songni Apostolic Nuncio Leopoldo Girelli, Sonibar salo, Tura-ona re·baaha aro Tura-ona sokbaani ja·man Cathedral Parish-o jinma olakkianiko dakdilangaha.
Girelli-ni Tura-ona re·baaniara bilsi 22-ni ja·man Apostolic Nuncio-ni Garo Hills-ona re·bataianiba ong·aha.
Apostolic Nuncio-ko rimchaksona gita hajal kotok manderang tom·chimongsotokaha aro attamni 4:00 bajimango jinma olakkianiko a·bachengaha.
Ia tom·bimonganio ua Isolni namgipa kattarangko aganprakangengon, Rongtalgipa Isolni pattianirangko on·angenba, an·tangtangni bebera·anio aro Isolna dangdike on·anio kim·kimgiparang ong·china tom·anio bak ra·giparangko didiangaha.
Jinma olakkia matchotani ja·man, Tura-ni Sacred Heart gilja noko tom·bimonganiko ong·atangtaiaha aro ia tom·bimonganio, Apostolic Nuncio-ko dingtang dingtang dilgiparang, dingtang dingtang Parish-ni Father-rang, aro manderangba rimchaksotokaha.
Most Rev Leopoldo Girelli-ko rimchaksoanio, a·dokni Chief Minister Conrad K Sangma, Tura-ni MDC Bernard N Marak aro dingtang dingtang dilgiparangba dongpae bak ra·angaha.
Ia tom·bimonganio a·dokni Chief Minister, Apostolic Nuncio-na rimchaksoani kattarangko aganangengon, Girelli-ko saksa bamgipa aro je somoioba grongna man·aigipa mande ine parakataha. Ian Apostolic Nuncio-ni dokgipa changna Meghalaya a·dokona re·baani ong·aha ine janapatengon, uni Garo Hills-ona re·baanichi manderangni bebera·aniko mangrakbatataha ine Sangma parakataha.
A·dokni namroro silroroanio Catholic Mondolirangni on·gilpaanirangko janapatengon, a·dokni dingtang dingtang biaprango lekka pora, an·seng baljokani aro songsalni namroro silroroanina bang·en on·gilaha ine a·dokni Chief Minister, Catholic Mondolirangko mittelpilangaha.
Sacred Heart gilja noko Apostolic Nuncio Leopoldo Girelli, tom·bimonganio bak ra·giparangna aganprakangengon, Garo Hills-o bebera·anirang ning·tuanina aro jatni daka rikanirangna mittelpilaniko parakangenba, Mondolini kamrango dakchakanirangko on·engani gimin a·dok sorkarikoba mittelpilangaha.
Isolni kamna aro toromo janggi tangna gita an·tangtangko on·kangna nangengani giminba Vatican Ambassador, ia tom·bimonganio aganangaha. Mondolini dal·roroanide dilgiparangni on·kanganiosa pangchakbata ine janapatskaengon, Isolna dangdike on·na okamaniko knachakna gita dedrangrangko didichina ua, Tura-ni Kristian nokdangrangko didiangaha.
