TURA: Garo Hills Autonomous District Council (GHADC) election-o susana gita Scheduled Tribe (ST) certificate-ko nangtelgipa ong·atna Executive Committee (EC)-ni tik ka·aniko jegalanina Phulbari-ni gitcham MLA SG Esmatur Mominin-ko Garoland State Movement Committee (GSMC) matnangatenba, GHADC election-o susana gita ST certificate-ko nangtelgipa ong·ataniara skatang niam donenga ong·ja indiba niam gita nangchongmotgipan ong·enga ine parakataha.
“Phulbari-ni gitcham MLA SG Esmatur Mominin-ni agangipa kattarangko chinga GSMC raken jegalenga maina uni agangipa kattarang, A·chik jatko gisik saataha ine chinga bebera·a. Ku·cholsan ong·ani, niam bidikni gimin tale ra·ani aro saksa sakgipinko mande ra·grikna nangani ong·engon, uni agangipa kattarangara, manderangko ding·chaobatata gitasa ong·aha,” ine GSMC-ni acting chairman Balkarin Ch Marak parakataha.
GHADC election-o gipin jatrang, mongsongbate Tribal ong·gijagipa manderangni susaani aro bak ra·paaniko champengchina gita ru·uta bilsirangonin Garo Hills-ni dingtang dingtang dolrang dabitokengachim aro adita salrangna skangsan, GHADC-ni Executive Committee, tom·e chanchirimenba, GHADC election-o susana gita ST certificate-ko nangtelgipa ong·gnok ine niamko ra·gatangachim.
Ia niamko ra·gatani bidingo janapatengon, “Iako GHADC-ni dilgiparang, sikkele ba ding·chaoe tik ka·aha ong·ja indiba ian Autonomous District Council (ADC)-rangko songani miksonganiko mesokanisa ong·ah,” ine GSMC-ni acting chairman parakataha.
GSMC-ni parakatani gitade, ADC-rangko British-rangni somoionin, Tribal-rangna on·gimin bil, a·a, janggi tangani bewal aro daka rikanirangko chel·chakna gita songe on·aha aro ia bil aro niamrangko Indian Constitution-ni Sixth Schedule ning·o on·aha.
GHADC-ara Garo Hills-ni Tribal-rangko, mongsongbate A·chikrangko chel·chakna on·gimin bilsa ong·ani gimin MDC election-rango susana gita ST certificate-ko nangtelgipa ong·ataniara skatang niamko donani ong·ja indiba niam bidiko pangchake nangani giminsa donaha ineba GSMC-ni acting chairman parakataha.
A·chik National Volunteers Council (ANVC) aro ANVC-B dolrangni tom·tomanina songgigrikanioba Union Home Minister aro a·dokni Chief Minister baksa Sixth Schedule a·jarango dongimin niamrangko rakkina gita songgigrikaha ine janapatengon, ia songgigrikanio, District Council election-rango nangchongmotgipa niamrangko ja·rikna gita tik ka·grikani donga ine GSMC parakataha.
GHADC election-o susana gita ST certificate dongna nanggen ine tik ka·aniko Phulbari-ni gitcham MLA Esmatur Mominin manigija niamni kosako re·badena jotton ka·genchimode A·chikrangni ka·a ding·chaoaniko chakna nanggen ineba GSMC mikrakataniko on·angaha.
GHADC-o ST certificate nangtelgipa ong·ataniko jegalanina gitcham MLA-ko GSMC matnanga
Date:
Share post:
