SHILLONG: Re·anggipa February-ni 19 tariko, Shillong-ni Lok Sabha MP Ricky Andrew J Syngkon-ni tanggitik saaniko man·e siangani ja·man da·o ong·atna nangenggipa Shillong Parliamentary Constituency-ni by-election-o National People’s Party (NPP) aro Bharatiya Janata Party (BJP)-ba susana miksongenganiko paraktokaha.
Iani bidingo, NPP-ni state president aro a·dokni Deputy Chief Minister Prestone Tynsong, kobor ra·timgipa manderang baksa agangrikengon, party-ni ning·o, membor-rang aro susana sikenggipa manderang baksa agangrikchengani ja·man party-ni candidate-ko tik ka·anggen ine parakataha.
“Chinga party-ni gisepo an·tangtang chanchirimani ja·man party-ni candidate-ko tik ka·gen,” ine Tynsong aganaha.
Shillong Lok Sabha by-election-o adita sak manderang, NPP-ni tikitchi susana sikenganiko parakaha ineba Tynsong aganaha.
Shillong Lok Sabha by-election-na nambatgipa candidate-ko seokna gita NPP-ni dilgiparang, pilak candidate-rangkon name nipilchenggen ineba NPP-ni state president parakataha.
Meghalaya a·doko sorkariko chalaienggipa party-ni dilgipako MP-na seokgenchimode, a·dok sorkari aro Parliament-ni gisepo nambate kamrangko ka·na man·e, a·dokna namgni ong·batgen ine janapatengon, a·dokni dingtang dingtang nanganirang, jekai Inner Line Permit (ILP), Khasi/Garo ku·sikko Eighth Schedule-o chapatani aro uandakgipa dingtang dingtang kamrangni bidingo ma·mong sorkari baksa nambate agangrikna man·gen ine Tynsong aganaha.
Shillong Lok Sabha By-election-na skang NPP-ni dilgiparang, GHADC election-na gisik on·batchengenga ineba NPP-ni state president parakataha.
Indake ong·engon, Shillong Parliamentary by-election-o BJP, gipin dolrang baksa bakrimgija, an·tangari jakgitele susana miksongenga ine BJP-ni spokesperson Mariahom Kharkrang parakataha.
Shillong Lok Sabha by-election-ni bidingo party-ni dilgiparang chanchirimna a·bachengaha aro tom·aniko ong·atchina gita ma·mongni party dilgiparangkoba didiataha ineba Kharkrang aganaha.
Ma·mongni party dilgiparangosan pilakan pangchakaigen ine janapatengon, ma·mongni dilgiparang ge·eta ong·ode uamang ia by-election-o gipin party-ni candidate-naba chakpana nangaigen ine Kharkrang parakataha.
2024 bilsini Parliamentary election-oba BJP susagija, NPP-ni candidate-na chakpaaniko on·angskaahachim ine nikna man·a.
Indake ong·genchimoba 2024 bilsio, Shillong Lok Sabha seat-ko Voice of the People’s Party (VPP) aro Tura seat-ko Congress cheangskaahachim.
