TURA: Garo Hills Autonomous District Council (GHADC)-o susana gita Scheduled Tribe (CT) certificate-ko nangtelgipa ong·atna tik ka·gipani bidingo gitcham MLA SG Esmatur Mominin aro gitcham MDC Sofior Rahman-ni jegalgipa kattarangna Garo Hills-o dingtang dingtang dolrangni nangrime bikotgipa Nangrimgimin A·chik Dol (NAD) aganchakaniko on·ataha.
“Skanggipao, Meghalaya a·dokko man·chape salgro salaramni adita biaprango donggipa Tribal jatrangni bil, daka rikani, a·a-chia aro sason ka·ani bewalrangko chel·chakna gitasa Indian Constitution-ni Article 244(2) aro Article 275(1) ning·o Sixth Schedule-ko ra·gataha ine an·ching ma·sie ra·na nanga. Ia niamrangni bidingo sing·doanide India Constitution-ni miksonganirangko ma·sisretanisa ong·a. Sixth Schedule-ko skatang tariaha ong·ja indiba Indian Constitution-ni Drafting Committee-ko dilgipa Chairman Dr BR Ambedkar, Fundamental Rights-na dongimin Advisory Committee-ni Chairman Sardar Vallabhbhai Patel, Tribal & Excluded Areas (Assam)-na Sub-Committee-ni Chairman Gopinath Bordoloi aro JJM Nichols Roy, Rupanath Brahma gita dakgipa dilgiparangni ning·osa India-ni Constituent Assembly, miksongmanchae tariaha,” ine NAD talataniko on·angenba, ia niamrangkoa Tribal manderangko aro uamangni jakgitele chalaigipa bimangrangko chel·chaknasa simsake segataha ine parakataha.
ST certificate-ara Indian Constitution-ni Article 342 ning·o Scheduled Tribe ine chanako man·gipa Tribal jatrangna niam gita on·gipa certificate-sa ong·a ine talataniko on·angskaengon, Sixth Schedule-ni ning·o on·gimin niam aro bilrangko jegalaniara niam bidikni gimin ma·sigijaniko ba miksongmanchaen pe·sretna jotton ka·aniko mesokanisa ong·enga ine NAD parakataha.
GHADC-ni election-rango bak ra·anide ADC-rangna on·gimin niam aro bil baksana Tribal-rangni a·arangna on·gimin niam retirangko ja·rikna nangani ong·a ineba NAD parakataha.
