TURA: East Garo Hills a·jani Dobu songo rike donenggipa Veterinary Centre-ko ru·uta bilsirangonin jakkalgija galchipe donenga ine Dobu jolni dingtang dingtang dolrang, chong·motan AHAM, ADIL, GSU, FKJGP, GSMC, ASWA, NGCO aro FAF dolrang parakatenba, ia Veterinary Centre-ko ta·raken chalaina a·bachengatchina a·dokni Chief Minister-ko didiataha.
Iani bidingo nangrimgimin NGO-rang, a·dokni Chief Minister-na seachi u·iatengon, ia veterinary centre-ko 2014 bilsion rikmanahachim indiba ia centre-o kam ka·gipa manderang dongjae, ia centre-ko chalaichipgija donengkua ine parakataha.
“Chingni chang mol·molanirangko dakahaoba ia veterinary centre-na veterinary doctor-ko songe on·chipkujaenga. Ia veterinary centre-na kam ka·giparangko on·chipgija donaniara, Dobu jolni manderangna simsakgijaniko mesokanisa ong·enga,” ine NGO-rang parakataha.
Dobu jolrango jilla kaanirangko sanchakram biaprang dongjani a·selan Dobu jolrango songdongenggipa manderang, an·tangtangni jilla kaanirangko Williamnagar ba Rongjeng-onasa ra·ange sanna bananirangko ra·na nangenga ine janapatengon, jilla kaanirangko indita chel·a biaprangona ra·na nangengani a·selan korosrang batna nangenga aro basakobarangde manderangni jilla kaanirang sina nangronga ine NGO-rang parakataha.
Ia veterinary centre-ko kulie on·genchimode, bangbang ong·e dongenggipa kamrangko sorkari gapatna man·e, ian kamna senge dongenggipa A·chik chadamberangnaba kamrangko tikate on·na chol ong·genchim ine NGO-rang parakataha.
Dobu songna permanent veterinary doctor-ko aro dakchake on·gipa manderangko songe on·china gitaba NGO-rang, a·dokni Chief Minister-ko didiataha.
