SHILLONG: Shillong Parliamentary by-election-o susaani bidingo da·o dipet United Democratic Party (UDP) mamingkon parakkujaengon, ia by-election-o susana gita skanirang dongjaenga ine UDP-ni dilgipa aro MLA Paul Lyngdoh parakatskaaha.
Iani bidingo kobor ra·timgipa manderang baksa agangrikengon, ua a·doktangni politics-on gisik on·batna nangnikengani gimin Shillong Lok Sabha by-election-o susajawa ine Bristibar salo Lyngdoh parakataha.
“Meghalaya a·dokon dakna nanggni kamrang bang·kuengani gimin anga a·doktangni politics-on dongkuna nangnikenga. Parliament-o kam ka·na man·gipa manderang a·doko bang·en donga,” ine Lyngdoh aganaha.
UDP-ni dilgiparang, uko susachina nangnika ong·ode ua maiko aganchakgen ine sing·on, ua an·tangna on·gipa cholko jechakaigen ine Lyngdoh parakataha.
“An·chingo kamni gimin ma·sigipa manderang bang·en donga aro na·simang niatgenchimode Assembly-ba da·o bilsigni ata ong·aha. Uni gimin Shillong constituency-ni manderangnasan ong·aigija Meghalaya a·dok gimikni namgninan anga ia term-kode matchotatna nangnikenga,” ine UDP-ni MLA aganaha.
Shillong parliamentary by-election-na Voice of the People’s Party (VPP)-de uamangni spokesperson Batskhem Myrboh-ko candidate dake mingaha indiba una agre da·o dipet gipin political dolrangde candidate-rangko mingskakujaengachim.
Re·anggipa February-ni 19 tariko, Shillong-ni Lok Sabha MP Dr Ricky AJ Syngkon, tanggitik saaniko man·e siangani ja·man Shillong Parliamentary Constituency-ni by-election-ko ong·atna nangengachim.
