TURA: Meghalaya Police (MLP)-ni dingtang dingtang kamrango rimnapako man·gipa sak 2968 gital police-rangna Bristibar salo, appointment letter-rangko sualataha aro ia appointment letter-rangko sualatanio, a·dokni Chief Minister Conrad K Sangma, Deputy Chief Minister I/c Home Prestone Tynsong, a·dokni Director General of Police (DGP) Idashisha Nongrang aro dingtang dingtang police official-rangba dongpae bak ra·angaha.
Meghalaya Police-o gital rimnapako man·gipa sak 2968 police-rangoni sak 1494-de Armed Branch Constable, sak 720-de Unarmed Branch Constable, sak 205-de MPRO Operator aro sak 195-de Firemen-ni kamrango ong·a.
Ia program-ko ong·atanio a·dokni Chief Minister, gital police-rangna aro dingtang dingtang gadangni police-rangna aganprakengon, ian Meghalaya a·doko police-rangni rimnapanio bang·batgipa ong·aha aro ian a·doko police-rangni kamrangko ka·anio bang·en dakchakani ong·gnok ine parakataha.
“Ia salara, a·dokna gisik ra·beani sal ong·gen maina ia salo, a·dokni itihaso bang·batsranggipa appointment letter-rangko sualatani ong·enga aro ian a·dok sorkarina namen rasong chaani ong·enga,” ine Chief Minister aganaha.
Meghalaya Police-ni dingtang dingtang kamrangna, sak 1,70,000-na baten manderang dorgastorangko galaha aro da·alo sak 3000 ong·na sipile kamo rimnapako man·gipa manderang, an·tangtangni appointment letter-rangko ra·chakenga ine janapatengon, indita sak gital police-rangna appointment letter-rangko sualatna man·aniara Police department-naba kusini aro chu·ongnikaniko ra·baani ong·aha ine Sangma aganaha.
Niam retiko rakkina gita kamko ka·engon, manderangna bamani gnang dangdike on·china gitaba gital police-rangko Chief Minister didiangaha.
