GH-o so·sojengjeng ong·ani batroroanga
TURA: Garo Hills Autonomous District Council (GHADC) election-na nomination file ka·ani skanggipa salo, Phulbari-ni gitcham MLA SG Esmatur Mominin-ko nomination file ka·na Tura-ni Deputy Commissioner (DC) office-ona re·baani ja·man, GHADC election-o gipin jatrangni susapaaniko jegalenggipa manderang, jinma chadrapaha aro jinma chadrapako man·e ua bewalan saknaanirangko man·na nangaha.
GHADC election-o susaenggipa candidate-rang, Scheduled Tribe (ST) certificate dongna nanggen ine adita salrangna Executive Committee (EC)-ni niamko ra·gatangani ja·man, iani bidingo Tribal ong·gijagipa manderang, mongsongbate gitcham MDC aro MLA-rang raken jegaltokskaengachim ine nikna man·a.
Sombar salo, GHADC election-na nomination file ka·aniko a·bachengaton, Phulbari-ni gitcham MLA Mominin, sakgipin Independent candidate Enamul Haque minggipa mande aro uamangna kam ka·enggiparang baksa DC office-ko kulina skangan DC office-ona sokbaaha ine kobor on·aha. Uamang DC office-ona sokbae, an·tangtangni nomination-ko file ka·na senge dongengmiting somoio bakan dingtang dingtang dolrang, kobor man·enba DC office-ona sokbaaha aro police-rang champengsona jotton ka·ahaoba uamang DC office-ona napdraange, Mominin, Enamul Haque aro gipin manderangko chadrapeaha.
Ja·mano bakan police-rang bang·bate ua biapona re·baenba, ia a·selko champengna man·eaha aro so·sojengjeng ong·ako namatna man·aha.
Doka man·gipa Mominin aro Enamul Haque-ko ja·mano police-rang, Tura Civil Hospital-ona rimange sanna bananirangko on·aha aro sanna bananirangko on·ani ja·man police-rangni chel·chakani gnang, uamangni biapona salangpilaha.
Phulbari-ni gitcham MLA SG Esmatur Mominin aro Tribal ong·gijagipa candidate-rangni nomination file ka·aniko ra·chakama ra·chakjawa, da·o dipet District Administration-oni maming talatanirang dongkujaenga.
Ia a·sel ong·ani ja·man, a·kawe jolrango so·sojengjeng ong·anirang batroroangjana gita sorkari, police dolrangko bang·bate donataha ine kobor on·aha.
GHADC election-na nomination file ka·aniko March 9 tarikoni 16 tarikona ong·atengachim ine nikna man·a.
