TURA: Ia sal somoirango Garo Hills Autonomous District Council (GHADC) election-na dongipa niamrangni bidingo jatgnini gisepo so·sojengjeng ong·anirangko nikna man·engani gimin Garo Hills-ni a·kawe jolrango, dolgni dinggrikanirangko warachakna gita chel·chakgipa sipai dolrangko chu·onga gita donatchina Garoland State Movement Committee (GSMC) Pedaldoba regional unit, West Garo Hills a·jani Deputy Commissioner-ko didiataha.
Iani bidingo West Garo Hills a·jani Deputy Commissioner-na sedoatengon, Sombar salo, Phulbari-ni gitcham MLA SG Esmatur Mominin aro Aminul Haque-ko GHADC election-na nomination file ka·na re·baani somoio dingtang dingtang dolrang aro manderang jinma, DC office-o chadrapahani a·sel ian a·kawe jolrango songdongenggipa manderangko ding·chaoata gita ong·engani gimin a·kawe jolrango songdongenggipa manderangna kenchakna nangani ong·enga ine GSMC Pedaldoba regional unit-ni chairman Rimjen Ch Sangma parakataha.
Ia a·sel ong·anichi, a·kawe jolrango songdongenggipa jatgnini manderang ding·chaogrikani ong·ani cholrang donga aro ian jatgnini manderangna kenchakna nangani ong·enga ine janapatengon, ia jolrango jatgni dinggrikaniko chel·chakna man·na gita sipai dolrangko nanga gita donatchina GSMC Pedaldoba unit, West Garo Hills a·jani Deputy Commissioner-ko didiataha.
