Tura: Social activist, Greneth Sangma, Phulbari-ni gitcham MLA SG Esmatur Mominin-ni kosako Baghmar PS-o badi ka·aha. Songsalo jat dolgnini manderangni tom·tome janggi tanganio ding·chauatgipa kattarangko agane golmal ong·atani gimin matnangaha.
Iana skang Opposition-ko dilgipa Mukul Sangma-ba apsan kattarangko agane Mominin-ni kosako FIR-ko segataha.
Garo Hills a·jao batanggimin March 9 tarikonin adita golmal ong·anirangko nikna man·aha. Mominin-ko GHADC election-o susana gita nomination file ka·na DC office-ona re·angmitingo uko chadarapaoni golmal ong·ani a·bachengaha. Ua somoinin Garo Hills-o so·sojengjeng ong·ani gimin GHADC election-ko ra·doataha.
Sangma-ni FIR segatgipao gitcham MLA Mominin-ko chadrapa man·a ja·man a·kawe jolona re·ange jinma manderangna ding·chauatgipa kattarangko aganprake golmal ka·aha ine matnangaha.
“Tura-o ong·gipa obostako ua jatni mamla ine mesokaha. Uni agangipa kattarang jat dolgnini gisepo golmalko ra·baaha uni agangimin kattarang bang·a manderangona gipangaha, jeni a·sel Garo Hills-o namen so·sojengjeng ong·aha ine Greneth aganaha.
“Golmal ong·anio manderang siaha aro bang·arang jokkom ong·aha, una agreba commercial establishment-rangko nosto ka·e galaha, jeni a·sel district administration tom·tomaniko rakkina gita curfew-ko ra·gatna nangaha aro chelchakgipa dolrangko wataha ine janape activist, ia mamlako name dake am·sandichina aro niamo pangchake ja·ku de·china mol·molaha.
