TURA:Garo Hills Autonomous District Council (GHADC) ni bidingo so·sojengjeng ong·enganiko chu·gimik tom·tomatna man·na gita aro GHADC-ni ning·o Sixth Schedule ni niamrangko skangonin srange ja·rikbajaengani a·selo ma·sisretgipa manderangna Sixth Schedule-ni chong·mot miksonganiko talbate u·iatna gita Tura ni MP Shri. Saleng Sangma, Civil Society Organizations, Senior Citizens, aro toromni dilgiparang baksa Sonibar salni bako Tura Circuit House-o tom·e chanchirimanga.
Ia tom·anio MP Saleng mongsonggipa ong·e jinma na aganprakangengon Sixth Schedule ni ning·o tribal rangna dingtangmancha on·gimin bilko skang chasongoni dilgiparangni chu·sokatna nangnikjani a·selsa ia salona kingking GHADC-o ja·manchake dongna nange dingtang dingtang neng·nikaniko chagrongenga ine janapangaha. Sixth Schedule ni miksonganian India a·songni Salgro-salaramo seokgimin a·dokrango atchikapgipa jatsa manderangni dakbewal-rikbewal, niam-reti, ku·aganani, aro changa-sapanirangko ripingan baksana songsalo mandetangoniko seoke sason ka·aniko dakna man·na gita, a·king-gore ko, aro jatni gam-jinrangko gipin jatrangni jakkalsretaniko champengna on·gimin bil sa ong·a ine MP Saleng, u·idapatanga.
Batanggimin somoirango gipin jatrangni GHADC election-o susae bak ra·anggipani bidingo aganangengon ian District Council ni bilsi 72 ong·pilaonaba gitcham dilgiparangni dakna nanganirangko chu·sokatna simsakjani a·sel ong·aha maina Sixth Schedule an Constitution ni ning·o tribalrangna dingtangmancha sason ni bidingo ja·rikna tarigimin niam-bidik ba bil sa ong·a jekon gipin jatrang ma·sisrete pangchakani gnanggipa ine a·kangskaenga ine u·idapate bakan GHADC-o chu·sokatna nanganirangko dilgiparang bimang ong·atgen ine ka·dongani kattarangko agandapanga.
