SHILLONG: Meghalaya a·dokni election-rango, India a·songo songdongkamgipa manderangsan bak ra·na man·na gita a·dokni electoral roll-rangko ta·raken Special Intensive Revision (SIR) dakchina Confederation of Meghalaya Social Organisations (CoMSO), ma·mong sorkari aro Election Commission of India (ECI)-ko didiataha.
Iani bidingo Union Home Minister Amit Shah aro ECI-na sedoatengon, Tribal manderangna on·gimin bil, niam reti, a·a chia aro daka rikanirangko chel·chakna nangengani gimin CoMSO janapataha.
Meghalaya a·dokara Bangladesh a·song baksa nangchapgipa a·dok ong·e, niam gri napsrukbagiparangna kenchakna nangani ong·a aro electoral roll-rangoba ka·dongna man·gijaniko ong·ata ine CoMSO-ni dilgiparang parakataha.
Electoral roll-rango, a·songo songdongkamgipa ong·gijagipa manderangkoba aro gipin biaprangoni napsrukbagipa manderangkoba napatani cholrang dongaia ine janapatengon, iandake electoral roll-rango, gipin biapni manderangko segataniara, election-ni kamrangko niam gri ong·ata gita ong·a aro ian Meghalaya a·doko songdongenggipa Tribal manderangna on·gimin bilrangko pe·ani gitaba ong·a ine CoMSO parakataha.
Meghalaya a·dokni electoral roll-rangko niam rakako done, parak ong·e, niamo pangchake aro somoi done nipiltaichina gita didiatengon, electoral roll-rangko SIR dakanichi, election-rango niam gri bak ra·paenggipa manderangko champengan baksana a·songo niam gri songdong a·chaenggipa manderangko ma·sina gitaba dakchakani ong·gen ine CoMSO parakataha.
SIR-ko dakanichi niam gri songdong a·chaenggipa aro chanchichipna kragipa manderangko biming den·galchina didiatengon, iako dakanichi a·songo songdongkamgipa manderangnade maming neng·nikanirangko ra·bajachina aro guale kimitmanjachina gita CoMSO didiataha.
