RESUBELPARA: Budbar salo, North Garo Hills a·jani Deputy Commissioner Dr Abhishek Saini, DSEO aro SDSEO baksa, Resubelpara Block-ni ning·o donggipa dingtang dingtang skulrangona re·ange niangaha.
North Garo Hills a·jani Deputy Commissioner, Resubelpara Govt UP School, RMSA, aro Resubelpara Govt Higher Secondary School-ona re·angenba, skulo skie on·ani bewalrang, chatro chatrirangni skie ra·ani aro skul nokrangkoba niangjolaha.
Skulrango poraienggipa bi·sarangna Mid-Day Meal (MDM) scheme-ni ning·o namgipa cha·anirangko on·engama on·jaenga, uarangkoba Deputy Commissioner niangaha. Ia skulrango MDM-na jakkalenggipa babilsirangkoba ua niangaha aro skulni bi·sarang baksa mikoba cha·paaha.
Skulo poraienggipa bi·sarangna cha·ani ringanirangko pangnan rongtal an·tale on·china gitaba Deputy Commissioner, skulni principal-rangna ge·etaniko on·angaha.
Ia skulrangko uni re·ange nianio ua bi·sarang baksaba agangrikaha aro bi·sarangni skie ra·anirangkoba knatime ra·angaha.
