TURA: North Garo Hills a·jani Mendipathar aro Resubelpara jillarango, dingtang dingtang gittimrango donggipa manderangni galenggipa jabolrangko nirokjaenga aro sale galjaengani a·sel ian manderangna neng·nikaniko aro nitogijaniko ong·atenga ine Meghalaya Pradesh Youth Congress (MPYC)-ni president Timjim Momin parakataha.
Iani bidingo, Resubelpara Municipal Board (RMB)-ni Chairman-na badi ka·doatengon, Mendipathar aro dingtang dingtang biaprango manderangni galenggipa jabolrangko chimonge galskajaengani a·sel ian jolo songdongenggipa manderangna aro dokkan dakgiparangna neng·nikanirangko ra·baan baksana nina nitokgijanikoba ong·atenga ine Momin parakataha.
Momin-ni parakatani gitade, Mendipathar Salpara Bazar, Mendipathar College rama, Mendipathar Mingchengram kal·chakram sambao, Mendipathar bazaar jolo, Dilma, Gajingpara aro gipin biaprangoba, manderangni galenggipa jabolrangko dane donako nikna man·enga aro ia jabolrang, kalbongrangoni ga·akonengani a·sel ian manderangna chaktogijagipa bibarangko ong·atenga.
Indake ong·engon, North Garo Hills a·jao, mongsongbate Mendipathar aro Resubelpara jolrango songdongenggipa manderangni namgnina ia jabol galram biaprangko ta·raken rongtalatchina aro pangnan ia biapo manderangni galenggipa jabolrangko somoi gita galjringchina MPYC-ni president, RMB-ni Chairman-ko didiataha.
