SHILLONG: Garo Hills Autonomous District Council (GHADC) election-rango susagipa candidate-rangna Scheduled Tribe (ST) certificate-ko nangtelgipa ong·atna re·anggipa February-ni 17 tariko, gitcham Chief Executive Membor (CEM) Albinush R Marak-ni u·iataniko on·anio Meghalaya Pradesh Congress Committee (MPCC)-ba chakpaaniko parakataha.
GHADC election-rango susagipa candidate-rangna ST certificate-ko nangtelgipa ong·atna ku·monganiko ra·chakangengon, iako dongimin niamrango pangchake raken ja·rikskana nanggen ine MPCC-ni working president Deborah C Marak parakataha.
“Ian nambegipa ja·ku de·ani ong·a indiba iako dongimin niamrango pangchake ja·rikskana nanggen,” ine Marak aganaha.
Autonomous District Council (ADC)-rango Tribal-rangna on·gimin bilrangko aro Tribal-rangni bak ra·aniko chel·chakna gita iandakgipa niamrangko name ja·rikna nangchongmota ineba MPCC-ni dilgipa aganaha.
National People’s Party (NPP)-ni ning·o ong·enggipa obostarangni bidingo aganna gita jechakangengon, GHADC-ni gitcham CEM Albinush Marak, an·tangsa kam wataha aro uko party-de ra·galjaha ine Marak talataniko on·angaha.
“Marak an·tangsa CEM-ni kamko wataha aro uni ja·mansa NPP, gital CEM-ko seokaha,” ine MPCC-ni working president, kobor ra·timgiparangna aganaha.
Ian sorkariko chalaienggipa party-ni bilni ning·on ong·a ine janapatskaengon, GHADC-ni dilgiparangko dingtangatanio NPP-ni ja·ku de·ani giminde Congress dol, mamingkoba aganpana man·jawa ine Marak parakataha.
