GH-o tom·tomaniko ra·bapilna dingtang dingtang dolrang tom·e chanchirima

TURA: Batanggimin sal somoirango, Garo Hills-ni dingtang dingtang biaprango so·sojengjeng ong·angani ja·man dingtang dingtang jatrangni gisepo tom·tomaniko ra·bapilna aro meli-nangrime janggi tangangkuna gita miksonganio, Garo Hills-ni dingtang dingtang dolrang, chong·motan, Tura-based Church Leaders Forum (TCLF), Mothers’ Union aro A·chik Baptist Dal·gipa Krima (ABDK)-ni dilgiparang, Budbar salo, West Garo Hills a·jani Dadenggre Block ning·o donggipa Gimegre relief camp-ona re·ange, songni manderang baksa apsan tom·e chanchirimangaha aro relief camp-rango ma·chakenggipa manderangna cha·ani aro dingtang dingtang bosturangkoba sokate on·angaha.
Koborko on·ani gitade, batanggimin sal somoirango, West Garo Hills a·jani Chibinang jolo so·sojengjeng ong·anganichi bang·a nokdangrangan nokgri jamgri ong·atako man·na nangtokaha aro nokgri jamgri ong·na nanggipa manderang da·o Gimegre relief camp-o ma·chaktokenga.
Ia dilgiparang, Rev Frithing D Sangma-ni Isolo bi·ani ja·man police-rangni dilanichi Tura Chandmari-o donggipa Krima Office-oni re·chakatangaha aro uamangko Sadolpara Baptist gilja nokoba rimchaksoaha.
Gimegre relief camp-ona sokangani ja·man uamang, songo noko donggipa manderang baksa golpogrike, uamangni neng·nikanirangko knatime ra·aha aro uamangna pilak nanga dakchakanirangko on·angaha. Relief camp-o dongenggipa manderangna cha·ani bosturang aro dingtang dingtang nanga bosturangko suale on·china gita uamang relief camp-ko nirokenggipa official-rangna pakwate on·angaha.
Ia tom·anio, West Garo Hills a·jani Additional Deputy Commissioner Pittingson R Sangma, Demdema Block-ni BDO Dr Rikrak N Marak, dingtang dingtang jatni dilgiparang aro songni manderangba dongpae bak ra·angaha.
Ia tom·anio dingtang dingtang dilgiparang aganprakengon, tom·tomaniko man·pilna gita tol·e jangbingbanganirangko bebera·jachina aro giproroatjachina didiani kattarangko aganangaha.
Saksa sakgipinko kema ka·grikna aro ku·mong nangrimaniko rakkichina didiangengon, gipin songrangoba iandakgipa tom·anirangko apsan nangrime ong·atna tik ka·angaha.
Ia tom·aniko Nokgipa Isolo bi·anichi a·bachengaha aro bi·anichian matchotataha.