SHILLONG: A·dok sorkarini maming ja·kurangko de·na changjahani a·selsa batanggimin sal somoirango Garo Hills-o so·sojengjeng ong·aniko nikna man·aha ine Opposition dolni dilgipa Mukul Sangma, a·dok sorkariko matnangatenba, ia so·sojengjeng ong·aniko jakgitele sandirokatchina gita dabiangaha.
Garo Hills Autonomous District Council (GHADC) election-ni bidingo ‘chalakki’ dakani aro sorkarini simsakjani a·selsa Garo Hills-o so·sojengjeng ong·aniko nikna man·aha ineba Sangma matnangataha.
Iani bidingo, a·dokni Governor CH Vijayashankar-na seachi u·iatengon, politics-ni gita ja·ku de·anichi aro sorkarini simsakjani a·sel so·sojengjeng ong·na nangaha ine Opposition dolni dilgipa parakataha.
District Council election-rango Tribal ong·gijagipa manderangko bak ra·na on·jachina dingtang dingtang dolrangni dabianirangko chu·sokatchipjani a·sel, GHADC-o gitcham Chief Executive Membor (CEM)-ni ST certificate-ko nangtelgipa ong·atna u·iatani bidingo aro Phulbari jolo gitcham MLA-ni niam gri tom·aniko ong·atani giminba ua, Governor-na sedoatgipa chittio janapataha.
Garo Hills-o dolgni manderangni dinggrike so·sojengjeng ong·anicho mande sakgni so·otako man·na nangaha aro Garo Hills gimikon so·sojengjeng ong·na nangahachim ine nikna man·a.
Ia so·sojengjeng ong·gnini bidingo sorkari skangan ma·sisoahaoba maming ja·kurangko de·samsojahani a·selsa Garo Hills-o so·sojengjeng ong·na nangaha ineba Sangma, Governor-na sedoatgipa chittio parakataha.
Ia so·sojengjeng ong·anio, gipin biaprangoni ong·gija dakgipa dolrangba, jatgnini gisepo ding·chaogrikaniko ra·baani cholrang donga ineba ua parakataha.
Ia sal somoirango, Garo Hills-o ka·sinsin tom·tomaniko man·na a·bachengengaha ine janapatengon, tom·tomaniko ra·bapilanio a·dok sorkarina bate, mondoliko dilgiparang aro ja·delgipa manderangsa kamrangko ka·dilaha ine Opposition dolni dilgipa mittelpilaniko parakangaha.
Ia so·sojengjeng ong·aniko sandirokna gita jakgitelgipa Commission-ko songchina a·dokni Governor-ko didiatengon, ST certificate-ni bidingo GHADC-ni u·iataniko, so·sojengjeng ong·aniko ra·bana dakdilgiparangko aro sorkari official-rangni chu·sokgijanirangko sandirokchina gita Sangma dabiangaha.
