Bilsi 74-ni ja·man GHADC-o niamko ra·gataniara gisik ra·beani sal: CM
TURA: Garo Hills Autonomous District Council (GHADC) election-rango Tribal ong·gijagipa manderang bak ra·pana man·jana gita taridapgipa Assam & Meghalaya Autonomous District (Constitution of District Councils) Rules-ko Sombar salo, GHADC-ni membor-rang nangrime ra·chakangaha.
Ia Assam & Meghalaya Autonomous District (Constitution of District Councils) Rules-ko GHADC-o taridape ra·chakahani gimin da·o ia Bill-ko a·dokni Governor ra·chakahaode, GHADC election-rango susana gita pilak candidate-rangan, Scheduled Tribe (ST) certificate-ko nangtelgipa ong·gnok.
Ia Bill-ko GHADC-o salgnina ong·atenggipa special session-ni skanggipa salo, membor-rang pilakan namnike ra·chakangaha aro da·o ia Bill-ko Act ba niamo ong·atna gita District Council Affairs (DCA) department-oni a·dokni Governor-ona watdoatna nanggnok.
GHADC-ko 1952 bilsio songchengaonin ia niamko taridapa dongkujani a·sel GHADC election-rango Tribal ong·gijagipa manderangba susae, District Council-o membor ong·na chol ong·paengachim aro ian District Council-ko on·ani miksonganikon pe·ani gita ong·engachim.
Batanggimin bilsirangonin Garo Hills-ni dingtang dingtang dolrang, GHADC election-o gipin jatrangni bak ra·aniko champengna gita ia niamko taridapchina dabitokengachim aro da·o bon·kame GHADC-o Tribal ong·gijagipa manderangni susaaniko champengna gita niamko pass ka·na man·aha.
GHADC election-o susagipa candidate-rang ST certificate dongna nangtelgen ine adita salrangna skang gitcham Chief Executive Membor (CEM) Albinush R Marak-ni u·iataniko on·ani ja·man, Tribal ong·gijagipa candidate-rangoniba GHADC election-o susana gita nomination file ka·drana jotton ka·ani ja·man Garo Hills-o so·sojengjeng ong·anirangko nikna man·angahachim.
So·sojengjeng ong·ani ja·man GHADC election-ko a·dok sorkari dontongatenba, GHADC-ni term-ko jadokna ra·dodapatskaaha. Gitcham CEM-ni kosako No-Confidence Motion-k dakna special session-ko ong·atna tik ka·on, Marak an·tangan kamko wate on·aha aro uni ja·man GHADC-o gital Executive Committee-ko songe, gital CEM-koba seokangaha.
Gital EC-ni membor-rang, ST certificate-ni bidingo chanchirime ja·kuko de·na man·na gita GHADC-ni special session-ko ong·atchina Governor-ko mol·molaton, special session-ko March-ni 23 aro 24 tarikrango salgnina ong·atchina ge·etaniko on·ataha aro uandaken ia special session-ni skanggipa salon, GHADC-ni membor-rang apsan chanchirimenba, GHADC election-o susana gita ST certificate-ko nangtelgipa ong·atna niamko pass ka·angaha.
Indake ong·engon, GHADC-o ia niamko pass ka·angani ja·man a·dokni Chief Minister Conrad K Sangma, Cabinet Minister Marcuise N Marak, Assembly-ni Speaker Thomas A Sangma aro NPP-ni dingtang dingtang dilgiparang, NPP office mikkango sengsoe dongenggipa manderangna parakataha aro ia koborko parakatani ja·man, ua biapo tom·chimongsogipa manderang, jinma kusi ong·e inchrotokaha.
GHADC-o ia niamko taridape ra·chakangahani gimin a·dokni Chief Minister Conrad K Sangma, an·tangni kusi ong·aniko parakatengon, GHADC-ko man·aoni da·o bilsi 74-ni ja·man, ia niamko pass ka·aniara GHADC-ni itihaso namen gisik ra·beani sal ong·aha ine parakataha.
District Council-rangko Indian Constitution-ni Sixth Schedule ning·o Tribal jatrangko chel·chakna gitasa on·aha ine janapatengon, da·alo GHADC-o ia ja·kuko de·aniara, District Council-rangko ra·gatani miksonganiko chu·sokatani gita ong·aha ine Sangma aganaha.
