SHILLONG: Meghalaya Democratic Alliance (MDA) sorkari rikanio bilsichet gapanio sorkarini a·dokni manderangna ka·enggipa kamrangko aro chu·sokanirangko Sonibar salo Shillong SRGT Football Ground-o ong·atgipa programo Chief Minister, parakangaha.
Tourism, Agriculture & Farmers’ Welfare-ni Minister T D Shira aro Umsning-ni MLA, Government Chief Whip, Dr C Lyngdoh, aro gipin official baksa Khasi aro Jaintia Hills-oni beneficiary-rangni dongpanio aganprakatmitingo CM Conrad, MDA sorkarini batanggimin bilsi 8 somoirangoni kam ka·baenganiko aro chu·sokanirangko parakangaha.
Sorkarini kam ka·anio beben neng·nikarang aro bang·en ra·bianirang sokgenchimoba a·dokni manderangni ka·donga aro dakchakanichi bilake kamrangko ka·na cholrang ong·aniko aganaha.
Beben sorkari, je kamrangko ka·na dakna miksonga, uarang chu·gimikkode chu·sokatna man·kujaenga indiba manderangni sorkario bebera·a aro ka·donganichi mikkangchiba ra·bianirangko warachake kam ka·angna miksonga ine CM aganaha.
Batanggimin bilsi 8 somoirango sorkarini pangkime dongani a·sel namgipa sorkariko rikna chol ong·aha. Jeni a·sel a·dokni namgnina ja·kurangko de·na man·aha. Uni gisepon sorkari, adita dal·dalgipa infrastructure-rangko ra·bana jotton ka·enga. Krorni kror project-rangko a·bachengaha.
PRIME programni gita batanggimin bilsi bongani gisepo kror 32.7 tangkako wataha. Tourism-ko bilakatna aro manderangni janggi tanganiko ra·dona kror 136 -tangkako homestay sector-o jakkalaha. Grassroot music-ko namdapatna kror 40 tangkako jakkalaha ine parakatengon, wilwilao donggipa environment-ko ripingna re·mikkanganio kror 120 tangkako Green Meghalaya-ni gita chamaha ine CM parakaha.
