SHILLONG: Da·o dipet Meghalaya a·dokni pilak biaprangon domestic ba noko jakkalgipa Liquified Petroleum Gas (LPG) cylinder-rang chu·onga gitan donga aro a·dokni manderangna maming neng·nikani grian suale on·enga ine a·dok sorkarini Food Civil Supplies & Consumer Affairs department parakataha.
Noko jakkalgipa LPG cylinder-rang chu·ongjana gita a·dokni dingtang dingtang biaprango songdongenggipa manderang jajrengtokenga ine songbadrangko seani ja·man a·dok sorkari, iani bidingo talataniko on·ataha.
Iani bidingo a·doko songdongenggipa manderangna talataniko on·atengon, a·doko LPG cylinder jakkalenggipa nokdangrangna maming neng·nikani grian suale on·angkuna man·na gita sorkari, obostarangko niroke kam ka·enga ine department-oni u·iataha.
Indake ong·genchimoba, Petroleum & Natural Gas Ministry-oni wataniko komiatahani a·sel commercial ba dokkanrango jakkalgipa LPG cylinder-rangsa chu·ongbrejaenga ine department u·iataha.
Meghalaya a·dokona dingtang dingtang biaprangoni manderang rona re·barongani gimin aro a·doko Piped Natural Gas (PNG)-rang dongjani gimin hotel aro restaurant-rango commercial LPG-rang bon·changjana gita a·dok sorkari, LPG cylinder-rangko bariatskachina ma·mong sorkariko didiataha.
LPG-rangko ra·dame donjachina, black paljachina aro dongimin damna bate paljachina gitaba Department, mikrakataniko on·angaha.
