TURA: West Garo Hills a·jao Phulbari-oni Rajabala-ona dakanggipa ramako NEC (NH-273)-ni ning·o tariahaoba, ramako name tarijani a·sel da·o jasani gisepon ramarang nosto ong·pilengaha ine All Meghalaya Minorities Students Union (AMMSU) aro All Meghalaya Minorities Labour Union (AMMLU), West Garo Hills a·jani Deputy Commissioner-na seachi badi ka·doangaha.
Deputy Commissioner-na sedoatgipa chittio AMMSU aro AMMLU dolrangni parakatani gitade, ia ramako jasa skangsan taria matchotahachim indiba da·o ia ramani obosta namjaengahani a·selan, ramako re·ruraenggipa manderang aro jolo songdongenggipa manderang, neng·nikanirangko man·na a·bachengpiltaiengaha.
“Phulbari-oni Rajabala-ona dakanggipa ramako NEC-ni ning·o gong kror 9.80 korosrangchi adita somoirangna skangsan tariahachim indiba ia ramako taria matchotaoni jasani gisepon ia rama nosto ong·na a·bachengpiltaiaha. Ia rama da·o obosta namsrangjahani a·sel manderang neng·nikanirangko chagrongna nangtaiengaha,” ine dolgni NGO-rang parakataha.
Ia ramako tarianio, kamrangko name ka·jaha aro manderangni tangka paisarangko name jakkaljahakon ine janapatengon, iandake kamrangko ka·aniara manderangna kenchakna nanganiko ra·baan baksana sorkarini kamrangko ka·anio ka·dongna man·gijaniko ong·ata ine dolgni NGO-rang parakataha.
Ia ramako tariani bidingo jakgitele sandirokchina aro ia ramako tarianio jak donggipa manderangni kosako rakgipa ja·kurangko de·china gitaba AMMSU aro AMMLU dolrang, West Garo Hills a·jani Deputy Commissioner-ko didiataha.
“Mikkangchi manderangni namgnina kamrangko ka·anio ka·dongani gri ong·jana gita ia ramako tariani bidingo sandirokchina aro rakgipa ja·kurangko de·china chinga mol·molenga,” ine dolgni NGO-rang parakataha.
