BAGHMARA: South Garo Hills a·jani District Selection Committee (DSC), Lower Division Assistant (LDA) post-na gitalgipa manderangko kamna rimnapao kakketgipa bewalo ba kragipa niamrangko ja·rikgija seokaha ine matnange saksa a·jani Deputy Commissioner, DSC Chairman aro Secretary-na lekka seachi u·iatange Computer Typing Test ko ong·atpiltaichina mol·molaha.
Iano gital seoka man·giparangoni gimikande kragipa candidate ong·ja ine matnangenggipa Te. Jhonprizebirth M. Sangma, jean DSC porikkao Roll No. 1463 ong·enba porikkao name chu·sokataha ine a·kange porikka ra·taichina dabiaha.
Uni chittio, janapani gita a·jani District Selection Committee member-rang, Hilmen G. Momin, Racha N. Marak aro Tengra M. Marak-mangko bimung mingenba, LDA post-na seokako man·gipa candidate-rang baksa Typing Test ko ong·atpiltaichina mol·molangaha jeon seoka man·gipa candidate rangoni jeba Te. Jhonprizebirth na bate typing test-ko nambate chu·sokna man·jaode ua candidate ko merit list-oniko bimung den·galchina, ba Te. Jhonprizebirth seoka man·gipa candidate rangna bate typing test ko komie man·skagenchimode Authority-ni nangnika gita je sasti koba ua mikkangchakgen ine ku·rang on·enba re·baenggipa Butbar sal April jani 08, tariko seoka man·gimin candidate rang baksa typing test-ko ong·atpiltaichina mol·molaha.
