TURA: Garo Hills-o, mongsongbate a·kawe jolrango niam gri napsrukbae songdong a·chaenggipa manderangko aro niam gri pu·onenggipa manderangko biming den·galna man·na gita electoral roll-rangko Special Intensive Revision (SIR) dakchina dabianio bakrimaniko on·china Tura-ni MDC aro Bharatiya Janata Party (BJP)-ni state vice president Bernard N Marak, Garo Hills-o songdongkamgipa manderangko didiataha.
Marak-ni parakatani gitade, Garo Hills-ni a·kawe jolrango, gipin biaprangoni napsrukbae songdong a·chaenggipa manderang batroroengani a·sel Tribal manderangnan batpilengahani gimin niam gri songdong a·chaenggipa manderangko sandina aro electoral roll-rangoniko biming den·galna gita BJP kang·kare kae kam ka·enga.
“1971 bilsio East Pakistan-ko bak dakani ja·man gitcham Congress sorkarini somoio, gipin biaprangoni manderang Garo Hills-o katnape songdong a·chana a·bachengahani a·selan a·kawe jolrango gipin jatrang jelbra jelsuna a·bachengaha aro ia jolrango Tribal-rangni dake cha·enggipa bading chiwalani aro a·a-chiarangkoba ra·sekna a·bachengaha. East Pakistan-ko bak dakani ja·man napsrukbagipa manderangko politician-rang, an·tangtangni vote bank dake donahani a·sel a·kawe jolrango, Tribal jatrangna bate da·o gipin jatrangsa bang·batskaaha,” ine Marak parakataha.
Bangladesh a·songoni niam gri napsruke songdong a·chaenggipa manderangko sandina gita SIR dakchina dabianio, Garo Hills-o songdongkamgipa manderang pilakkon bakrimchina gitaba Tura MDC didiataha.
“Constitution-o a·brini Tribal-rangna on·gimin Sixth Schedule-ni niamrangko pe·e, gitcham sorkarirang, gipin biaprangoni napsrukbagipa manderangnaba apsan bil aro janggi tangani cholrangko on·na ku·rachakaha. Niam gri napsrukbae songdong a·chagipa manderangko sandianirang dongjahani a·selan batanggimin bilsi bongani gisepo, GHADC-ni bang·a polling station-rangon pu·ongiparang rang·san tang·doangaha,” ine BJP-ni state vice president parakataha.
Niam gri napsrukbae songdong a·chaenggipa manderangko sandianirang dongjagenchimode mikkangchi Garo Hills-o nangana bate gipin jatrang jelbra jelsubatgnok ine janapatengon, Garo Hills-o songdongenggipa Tribal jatrangni namgnina SIR-ko dakna nangchongmotenga aro SIR-ko dakchina dabianio pilakan bakrimaniko on·na nanga ine Marak parakataha.
