SHILLONG: A·dokni Chief Minister Conrad K Sangma-ko grongna gita somoi on·china bi·gipani bidingo maming aganchakanirangko on·kujaenga ine Sombar salo, Joint Action Committee Muster Roll Workers Union (JACMRWU) suk ong·gijaniko parakataha.
JACMRWU-ni u·iatani gitade, muster roll worker-rangni dingtang dingtang neng·nikanirangko Chief Minister-na aganna aro memorandum-ko on·na gita re·anggipa bilsini November 27 tarikon uamang chittiko on·ahachim indiba da·o jabonga ong·angpilengahaoba, uamangna maming aganchakanirangko on·kujaenga.
Iani bidingo Chief Minister-ni Office (CMO)-na seachi u·iattaiengon, uamang changni chang Chief Minister-ko gronge agangrikna bi·ahaoba da·alonan maming aganchakanirangko on·kujaenga ine JACMRWU-ni general secretary Bympher Lyndem parakataha.
Muster roll worker-rangara, a·doko dingtang dingtang nanga kamrangko ka·e on·giparangsa ong·a aro ia union-o bang·e muster roll worker-rangan dongani giminsa uamangni neng·nikanirangko a·dokni Chief Minister-na u·iatna gita uamang somoiko bi·engachim ineba Lyndem parakataha.
Indake ong·engon, uamangni mol·molaniko knachakchina aro uamangko grongna gita somoiko on·china gitaba JACMRWU, a·dokni Chief Minister-ko didiataha.
Chief Minister-ko gronge agangrikanichi, muster roll worker-rangni neng·nikanirangko namatna man·gen ineba union-ni dilgiparang, ka·dongchakenganiko parakataha.
